سری نگر: مقبوضہ جموں و کشمیر میں قابض بھارتی فوجیوں نے مزید 3 بے قصور نوجوانوں کو شہید کردیا ہے۔

بھارت کے غیر قانونی زیر قبضہ جموں وکشمیر میں بھارتی فوجیوں نے اپنی جاری ریاستی دہشت گردی کی تازہ کارروائی کے دوران آج ضلع بڈگام میں مزید تین کشمیری نوجوان شہید کر دیے ہیں۔

کشمیر میڈیا سروس کے مطابق فوجیوں نے نوجوانوں کو ضلع کے علاقے چاڈورہ میں محاصرے اور تلاشی کی کارروائی کے دوران شہید کیا۔

 واضح رہے کہ گزشتہ دنوں بھی مقبوضہ کشمیر میں ضلع پلوامہ کے علاقے چند گام میں قابض بھارتی فوج نے سرچ آپریشن کی آڑ میں چادر و چار دیواری کا تقدس پامال کرتے ہوئے گھر گھر  تلاشی کی آڑ میں 3 نوجوانوں کو شہید کردیا تھا۔

بھارتی فوج کا دعویٰ تھا کہ تینوں نوجوان فائرنگ کے تبادلے میں زندگی کی بازی ہارے ہیں جبکہ بھارتی میڈیا کا کہنا تھا کہ جام شہادت نوش کرنے والے تینوں نوجوان مقبوضہ کشمیر کی آزادی کے لیے مسلح جد و جہد میں مصروف تھے۔

خیال رہے کہ گزشہ دنوں ہی مقبوضہ کشمیر اور آزاد کشمیر سمیت دنیا بھر میں آباد کشمیری عوام نے یوم حق خود ارادیت کا دن منایا جبکہ اس موقع پر سری نگر کی سڑکوں پر خصوصی پمفلٹ بھی چسپاں کئے گئے تھے۔