امریکا میں پارلیمنٹ پر حملے کو ایک سال مکمل ہوگئے جس موقع پر صدر جوبائیڈن نے پیغام جاری کیا ہے۔

غیر ملکی خبر رساں ادارے کے مطابق امریکی صدر جوبائیڈن کا پارلیمنٹ پر حملے کو ایک سال مکمل ہونے پر کہنا تھا کہ ’ڈونلڈ ٹرمپ جھوٹے اور خود غرض شخص ہیں جنہیں اپنی ہار قبول نہیں ہوئی۔

صدر جوبائیڈن نے امریکا میں جمہوریت کے دفاع کے عزم کا اظہار کرتے ہوئے کہا کہ ڈونلڈ ٹرمپ نے 2020 کے انتخابات سے متعلق جھوٹ کا جال بچھایا، انہوں نے ایسا اس لیے کیا کیونکہ وہ طاقت کو اصول پر اہمیت دیتے ہیں۔

امریکی صدر کا کہنا تھا کہ سابق امریکی صدر ملک کے مفاد سے زیادہ ذاتی مفاد کو اہمیت دیتے ہیں۔ میں کسی کو بھی جمہوریت کے گلے پر خنجر نہیں رکھنے دوں گا جبکہ اس موقع پر پارلیمنٹ پر حملے میں مرنے والوں کی یاد میں ایک منٹ کی خاموشی بھی اختیار کی گئی تھی۔

دوسری جانب سابق امریکی صدر ڈونلڈ ٹرمپ کا بھی موقف سامنے آیا ہے جس میں ان کا کہنا تھا کہ جوبائیڈن نے آج میرا نام صرف امریکا کو مزید تقسیم کرنے کے لیے استعمال کیا ہے۔

ڈونلڈ ٹرمپ کا مزید کہنا تھا کہ یہ سیاسی تھیٹر صرف اس حقیقت کے لیے خلفشار ہے کہ جوبائیڈن مکمل طور پر ناکام ہوچکے ہیں۔

واضح رہے کہ سابق امریکی صدر ڈونلڈ ٹرمپ کا موقف ہے کہ 2020 میں ہونے والے امریکی صدارتی انتخابات میں انہیں فراڈ کے ذریعے شکست ہوئی ہے جبکہ ان کے موقف پر کئی ری پبلکن اب بھی یقین رکھتے ہیں۔

یاد رہے کہ ڈونلڈ ٹرمپ کے حامیوں نے صدارتی انتخابات میں جوبائیڈن کی کامیابی کے بعد امریکی پارلیمنٹ پر حملہ کردیا تھا جس کی حمایت ڈونلڈ ٹرمپ نے بھی کی تھی۔

اس حملے کے بعد ڈونلڈ ٹرمپ کو مواخذے کا بھی سامنا کرنا پڑا تھا جبکہ کیپیٹل ہل پر حملے کی حمایت کرنے پر ان کے سوشل میڈیا اکاؤنٹس بھی بند کردیے گئے تھے۔