متحدہ عرب امارات (یو اے ای) کے وزیر اعظم اور دبئی کے حکمران شیخ محمد بن راشد المکتوم نے ایک ہزار ذہین لوگوں کی تلاش کا مشن شروع کردیا۔

مقامی میڈیا کی رپورٹ کے مطابق شیخ محمد بن راشد المکتوم نے اپنے اقتدار سنبھالنے کی 16ویں سالگرہ کے موقع پر ایک پروجیکٹ شروع کرنے کا فیصلہ کیا ہے جس میں مختلف شعبوں میں ماہر ترین ایک ہزار عربی لوگوں کو تلاش کیا جائے گا ۔

یو اے ای کے نائب صدر و وزیر اعظم نے کہا کہ ’مستقبل کا میوزیم‘ ان باصلاحیت افراد کے لیے ایک مرکز کا کام کرے گا جو کہ جلد ہی کھل جائے گا۔

انہوں نے مزید کہا کہ حال ہی میں ہم نے سائنس کے میدان میں ’مستقبل کے میوزیم‘ کے طور پر ایک بین الاقوامی کامیابی حاصل کرلی ہے، یہ نئی عرب تحریک کے فکری اور انتظامی مرکز کا کام کرے گا۔

اماراتی وزیر اعظم نے کہا کہ ذاتی طور پر مجھے یقین ہے کہ سائنس، اسکالرز اور نئے آڈیاز کے حامل لوگ بہتر تبدیلی لا سکتے ہیں۔

شیخ محمد بن راشد المکتوم نے کہا کہ ’ڈی ایچ100 ملین پروجیکٹ‘ اگلے پانچ سالوں میں طبیعیات، ریاضی، پروگرامنگ سائنس، تحقیق اور معاشیات کے شعبوں میں ایک ہزار ذہین ترین لوگوں کی تلاش کرے گا۔

دبئی کے حکمران کا مزید کہنا ہے کہ ان ذہین لوگوں کو عالمی دانشوروں، محققین اور کمپنیوں کے ساتھ جڑنے میں مدد ملے گی تاکہ وہ اپنے خیالات کو فروغ دے سکیں اور اپنی صلاحیتوں کو مزید نکھار سکیں۔

انہوں نے کہا کہ تہذیبیں اپنے حقیقی بنانے والوں کی تلاش سے ترقی کرتی ہیں۔ جو قوم اپنے علماء اور مفکرین کی قدر کرتی ہے اور انہیں اپنا کردار ادا کرنے کے قابل بناتی ہے وہ ہی ترقی کرتی ہے۔

واضح رہے کہ شیخ محمد کو دبئی کے حکمران کا عہدہ سنبھالے آج 16 سال مکمل ہوگئے ہیں۔