شام : مسلسل خانہ جنگی کے باعث سردیوں کے موسم میں لوگوں نے گرمائش حاصل کرنے کے لیے میزائل کو ہی ہیٹر بنا لیا۔

 خبر ایجنسی کے مطابق صوبے ادلب کے شہر جسر ال شُغر میں اسعد العبید نامی شخص نے اپنے گھر میں میزائل کو ری سائیکل کرکے اسے ہیٹر میں بدل دیا ہے۔

شامی شہری اسعد العبید کا اس حوالے سے کہنا ہے کہ ملک میں مسلسل جنگ کے باعث یہاں کے لوگ ہیٹرخریدنے کی سکت نہیں رکھتے اسی لیے بچے اور خواتین سمیت دیگر افراد علاقے میں گرے ہوئے میزائل اور راکٹ ڈھونڈتے رہتے ہیں کہ آیا کوئی ایسا ہو جو پھٹا نہ ہو۔

اسعد کا کہنا تھا کہ انہیں بھی یہ میزائل گھر کے پاس سے ملا جسے انہوں نے قریبی لوہار سے ہیٹر میں تبدیل کروا لیا۔

یاد رہے کہ مقامی لوہار 28 سے 32 سینٹی میٹر فاصلہ رکھ کر راکٹ اور میزائلوں کو احتیاط سے خالی کرکے انہیں ہیٹر کے طور پر استعمال کے قابل بناتے ہیں، جبکہ میزائل کے بارود کو وہاں کے کان کن سرنگ کی تعمیر یا پتھر توڑنے کے لیے خرید لیتے ہیں۔