امریکی حکومت نے شہریوں کو گھر پر کورونا ٹیسٹ کرنے کی مفت سہولت کی فراہمی کے لیے نجی کمپنی آئی ہیلتھ لیب سے اضافی دس کروڑ کورونا کِٹس خرید لی ہیں۔

خبر ایجنسی روئٹرز کے مطابق امریکی محکمہ دفاع نے کہا ہے کہ یہ خریداری ملک بھر میں شہریوں کو گھر پر مفت ٹیسٹ کرنے کی سہولت کی فراہمی کے لیے 50 کروڑ کورونا کِٹس کی فراہمی کے وائٹ ہاؤس کے منصوبے کا حصہ ہے۔

رواں سال امریکی حکومت نے شہریوں کے لیے گھر پر چار کورونا کِٹس مفت منگوانے کی اسکیم شروع کی ہے جس کے تحت کوئی بھی شہری سرکاری ویب سائٹ سے کورونا ٹیسٹ کرنے کے لیے کِٹ آرڈر کر سکتا ہے اور اس کی ڈیلیوری ایک سے دو ہفتوں کے دوران ہو جاتی ہے۔

امریکا میں اومیکرون ویریئنٹ کے تیزی سے پھیلاؤ کے دوران شہریوں کو کورونا ٹیسٹ کرانے میں مشکلات کا سامنا ہے اور کئی علاقوں میں کورونا ٹیسٹ کرانے کے لیے کِٹس کی کمی کی شکایات بھی سامنے آئی ہیں۔

اس سے قبل بھی وائٹ ہاؤس کی جانب سے اس منصوبے کا اعلان کیا گیا تھا کہ شہریوں کو مفت فراہم کیے جانے کے لیے اضافی کورونا ٹیسٹ کِٹس کی خریداری کی جائے گی۔

ماضی میں امریکی صدر بائیڈن پر عالمی وبا کورونا وائرس کے پھیلاؤ پر قابو پانے کے سلسلے میں ٹیسٹ کرانے کی منصوبہ بندی کے فقدان کے باعث تنقید کی جاتی رہی ہے۔

روئٹرز کے مطابق گزشتہ چند ہفتوں کے دوران امریکا بھر میں کورونا ٹیسٹ کِٹس کی کمی نے اومیکرون کے پھیلاؤ کو روکنے کی حکومتی کوششوں کو مشکل سے دوچار کیا ہوا ہے۔