یمن میں حکومتی فورسز نے ایران کے حمایت یافتہ حوثی باغیوں کے ساتھ شدید جھڑپوں کے بعد تعز گورنریٹ میں ایک بڑےعلاقے کو آزاد کرا لیا ہے۔

عرب نیوز کے مطابق اتحادی افواج نے یمن کے مختلف علاقوں میں حوثی باغیوں کے مزید ٹھکانوں پر فضائی حملے کیے ہیں۔

اتحادی فوج کی فضائی مدد سے یمن میں حکومتی فوجی دستوں نے حوثیوں کو ان کے زیر کنٹرول علاقوں سے مزید  پیچھے دھکیل کر اذلہ اور خولود کے علاقوں کو آزاد کرایا ہے۔

یمن کے شہر مارب کے جنوب میں حکومتی حمایت یافتہ فورسز اور حوثی ملیشیا کے درمیان شدید لڑائی تاحال جاری ہے۔

یمن کی سرکاری خبر رساں ایجنسی سبا کے مطابق اتحادی افواج کے فضائی حملوں میں شدت کے بعد مارب کے مغرب اور جنوب میں حکومتی دستوں کے ساتھ شدید لڑائی میں درجنوں حوثی مارے گئے ہیں۔

دریں اثناء اتحادی افواج نے منگل کو رات بھر حوثی اہداف کے خلاف حملوں کا سلسلہ جاری رکھا۔ ان حملوں کے دوران مارب میں موجود مواصلاتی نظام، ہتھیاروں اور دیگر اسلحہ کے ایک ڈپو کو تباہ کر دیا گیا ہے۔