کینیڈا کے بعد نیوزی لینڈ میں بھی ٹرک ڈرائیورزکورونا پابندیوں کے خلاف سراپا احتجاج  ہوگئے ہیں۔

غیر ملکی خبر رساں ادارے کے مطابق نیوزی لینڈ کے ٹرک ڈرائیورز نے بھی کینیڈا میں جاری ٹرک ڈرائیورز کے احتجاج کی طرز پرآزادی کارواں کا آغاز کردیا ہے۔

نیوزی لینڈ میں ٹرک ڈرائیورز ماسک اورویکسین کی لازمی شرط  کے خلاف احتجاج کررہے ہیں۔

ٹرک ڈرائیورز نے دارالحکومت ویلنگٹن میں پارلیمنٹ کے اطراف کی سڑکوں سمیت دیگرشاہراہوں کوبند کردیا ہے۔

ٹرک ڈرائیورز نے کورونا سے متعلق وزیراعظم جیسنڈا آرڈرن کی پالیسیوں کوانتہائی سخت قراردیتے ہوئے کورونا کی پابندیاں واپس لینے کا مطالبہ کیا ہے۔

واضح رہے کہ  کینیڈا کے دارالحکومت اوٹاوا میں  بھی کورونا پابندیوں کے خلاف ٹرک ڈرائیورز کی ہڑتال  جاری ہے۔

دو روز قبل دارالحکومت اوٹاوا  میں ٹرک ڈرائیورز کی ہڑتال کے باعث ایمرجنسی نافذ کردی گئی تھی۔

اوٹاوا کے مئیرنے اپنے بیان میں کہا  تھا کہ صورتحال مکمل طورپرقابو سے باہرہے اورمظاہرین کی تعداد پولیس اہلکاروں سے زیادہ ہوگئی ہے، مظاہرین شہریوں کی سلامتی کے  لیے خطرہ ہیں۔