امریکا نے روس کے خلاف مالی پابندیوں کا اعلان کر دیا ہے۔ یورپی یونین نے بھی روس کے خلاف اقتصادی پابندیوں کی منظوری دے دی ہے۔

وائٹ ہاؤس کی طرف سے جاری ایک بیان کے مطابق صدر بائیڈن نے کہا کہ یوکرائن پر روسی حملے کا آغاز ہو چکا ہے۔ یوکرائن کے بارے میں صدر پیوٹن کے دعوے ہمیں دھوکے میں نہیں رکھ سکتے، روس کے خلاف مزید سخت پابندیاں عائد کی جائیں گی۔

صدر جو بائیڈن نے کہا کہ امریکا روس کے دو مالیاتی اداروں پر مکمل طور پر پابندی اور روس کے لیے قرضوں پر جامع پابندی عائد کر رہا ہے۔ جو بائیڈن کے مطابق روسی حکومت کا مغرب کے مالیاتی اداروں سے لین دین ختم کر دیا گیا ہے۔

اُدھر یورپی یونین نے بھی روس کے خلاف پابندیاں عائد کرنے کی منظوری دے دی۔ یہ پابندیاں اگلے چند دنوں میں نافذ ہو جائیں گی۔ فرانس کے وزیر خارجہ ژاں لی دریاں نے یورپی یونین کی جانب سے پابندیوں کی تصدیق کرتے ہوئے کہا کہ یہ فیصلہ متفقہ طور پر کیا گیا۔

یورپی یونین  کے خارجہ امور کے سربراہ جوزیپ بوریل کا کہنا ہے کہ ان پابندیوں کے تحت روس کے ان 351 اراکین پارلیمنٹ، 27 دیگر افراد اور اداروں کو ہدف بنایا گیا ہے جنہوں نے یوکرائن کی سالمیت اور خود مختاری کے لیے خطرہ پیدا کیا ہے۔

جرمنی نے بھی روس کے ساتھ نارڈ اسٹریم ٹو گیس پائپ لائن پر کام روکنے کا اعلان کیا ہے۔

روس یوکرائن تنازع میں نئی پیش رفت کے بعد امریکی وزیر خارجہ انٹونی بلنکن نے روسی ہم منصب سرگئی لاوروف سے آج ہونے والی ملاقات منسوخ کر دی ہے۔

انہوں نے کہا کہ حملہ شروع ہوگیا ہے اور روس نے یہ واضح کر دیا ہے کہ وہ سفارت کاری کو مسترد کرتا ہے، ایسے میں ملاقات کا کوئی مطلب نہیں رہ جاتا۔