نائیجیریا کے ساحل پر 20 لاکھ بیرل تیل کی پیداوار اور ذخیرہ کرنے والے جہاز میں دھماکہ ہوگیا جس میں عملے کے 10 ارکان سوار تھے۔

غیر ملکی خبر رساں ادارے کے مطابق  یومیہ 22,000 بیرل تیل پروسیس  کرنےوالا ’ایف پی ایس او ٹرینیٹی اسپرٹ‘   نامی جہاز    جنوبی نائیجیریا میں واری کے قریب موجود تھا جب اس میں آگ بھڑک اٹھی۔

ایف پی ایس او ٹرینیٹی اسپرٹ  جہاز جسے آف لوڈنگ کے لیے بھی استعمال کیا جاتا ہے، شیبہ ایکسپلوریشن اینڈ پروڈکشن کمپنی لمیٹڈ کی ملکیت ہے۔
کمپنی کے چیف ایگزیکٹو  کا کہنا ہے کہ فوری طور پر ہلاکتوں کی کوئی اطلاع نہیں  ملی ہے۔

https://twitter.com/Resonant_News/status/1489457875030315010

انہوں نے تصدیق کرتے ہوئے کہا کہ جہاز میں عملے کے 10 افراد موجود تھے اور ہم ان کی حفاظت کے حوالے سے تحقیقات کو ترجیح دے رہے ہیں۔

انہوں نے مزید کہا کہ دھماکے کی وجہ جاننے کے لیے  بھی تحقیقات جاری ہیں جبکہ مقامی کمیونٹیز اور ایک ملٹی نیشنل آئل کمپنی کی مدد سے صورتحال پر قابو پانے کی کوششیں کی جا رہی ہیں۔

سوشل میڈیا پر وائرل ہونے والی فوٹیج میں دیکھا جا سکتا ہے کہ جہاز ڈوب رہا ہے اور اس میں سے گھنے سیاہ دھوئیں کے بادل آسمان کی طرف اٹھ رہے ہیں۔