سعودی عرب کی قیادت میں عرب اتحادی افواج نے اعلان کیا ہے کہ انہوں نے یمن کے دارالحکومت صنعا اور دیگر صوبوں میں حوثیوں کے ٹھکانوں کے خلاف فضائی آپریشن شروع کیا ہے۔

عرب اتحادی افواج کا یہ بیان سعودی عرب کی سرکاری خبر رساں ایجنسی ایس پی اے کی جانب سے شائع ہوا ہے۔

بیان میں کہا گیا کہ سال 2014ء سے اب تک حوثی باغیوں کے قبضے میں موجود یمنی دارالحکومت صنعا اور دیگر یمنی صوبوں میں حوثی اہداف کے خلاف فضائی آپریشن شروع کیا گیا ہے۔

عرب عسکری اتحاد کے بیان میں مزید کہا گیا ہے یہ آپریشن حوثی حملوں سے شہریوں کو تحفظ فراہم کرنے کے لیے کیا گیا ہے اور یہ حوثی باغیوں کی دھمکیوں کے خلاف فوجی تقاضا تھا۔

دوسری جانب حوثی باغیوں کے نمائندہ چینل المصیرہ کے ٹوئٹر اکاؤنٹ پر شیئر کی گئی خبر میں بتایا گیا ہے کہ اتحادی افواج نے صنعا کے بین الاقوامی ایئرپورٹ پر 4 فضائی حملے کیے۔

ایران کے حمایت یافتہ حوثی باغیوں نے حالیہ چند ماہ میں سعودی عرب اور متحدہ عرب امارات میں واقع تنصیبات پر اپنے میزائل حملوں میں اضافہ کر دیا ہے جب کہ دوسری جانب عرب عسکری اتحاد اور یمنی حکومتی فوج نے بھی حوثی مسلح گروہوں کے ٹھکانوں پر جوابی حملے اور فضائی کارروائیاں تیز کر دی ہیں۔

گزشتہ روز بھی عرب اتحادی افواج نے مارب اور حجہ کے علاقوں میں 16 ٹارگٹڈ فضائی آپریشن کیے تھے۔

حوثی باغی ستمبر 2014ء سے یمن کے دارالحکومت صنعا اور کچھ دیگر علاقوں پر قابض ہیں۔ سعودی عرب کی قیادت میں متحدہ عرب امارات سمیت عرب اتحادی افواج مارچ 2015ء سے حوثی باغیوں کے خلاف یمن کی حکومت سے تعاون کر رہی ہیں۔