روسی حملے کے بعد یوکرین میں بڑے پیمانے پر تباہی ہونے کا خدشہ ہے۔

غیر ملکی خبر رساں ادارے کی رپورٹ کے مطابق ایک مغربی انٹیلیجنس اہلکار کا کہنا ہے کہ روس کے یوکرین پر حملے کے نتیجے میں لوگ بڑی تعداد میں بے گھرہوجائیں گے۔

انٹیلیجنس اہلکار کا کہنا تھا کہ اس حملے سے یوکرین میں بڑے پیمانے پر تباہی اور اموات کے ساتھ ساتھ تارکین وطن کی تعداد بھی بڑھے گی۔

رپورٹ میں کہا گیا ہے کہ روس نیٹو کے دیگر ممالک کے خلاف بھی اقدامات اٹھا سکتا ہے جن میں سائبر اور ہائبرڈ حملوں کے علاوہ براہ راست حملے شامل ہیں۔

واضح رہے کہ اس سے قبل 2014 میں جنگ کے نتیجے میں مشرقی یوکرین میں 14 لاکھ لوگ بے گھر اور 14 ہزار اموات ہوئی تھیں۔

یاد رہے کہ روسی صدر ولادیمیر پیوٹن نے یوکرین کے علاقے ڈونباس میں فوجی آپریشن کا اعلان کیا تھا جس کے چند منٹ بعد ہی روس کی جانب سے یوکرین پر پہلی گولہ باری اورمیزائل حملے داغے دیے گئے تھے۔

خیال رہے کہ انہوں نے یہ اعلان ایک ایسے وقت میں کیا ہے جب اقوام متحدہ کی سلامتی کونسل کی جانب سے ایسا نہ کرنے کا پرزور مطالبہ کیا جارہا تھا۔

دوسری جانب یوکرینی شہریوں کا دارالحکومت سے انخلا شروع ہوگیا ہے اور ایکسپریس وے پر گاڑیوں کی لمبی قطاریں دیکھی گئی ہیں جبکہ لوگ خود ساختہ طور پر شہر چھوڑ کر جا رہے ہیں۔

          یوکرین کے صدر ولادیمیر زیلینسکی نے ملک میں مارشل لا نافذ کرنے کا بھی اعلان کردیا ہے۔ انہوں نے کہا کہ روس نے ہماری سرحدی چوکیوں اورفوجی تنصبات پر حملے شروع کردیے ہیں۔