نئی دہلی: لوک سبھا کے رکن پارلیمنٹ اسد الدین اویسی کا کہنا ہے کہ ایک دن باحجاب لڑکی ہندوستان کی وزیر اعظم ہوگی۔

غیر ملکی خبر رساں ادارے کے مطابق بھارت میں لوک سبھا کے رکن پارلیمنٹ اسد الدین اویسی نے اعلان کیا ہے کہ حجاب پہننے والی لڑکی ایک دن ہندوستان کی وزیر اعظم ہوگی۔

آل انڈیا مجلس اتحاد المسلمین کے سربراہ اسد الدین اویسی نے اتوار کو ایک ویڈیو ٹوئٹ کیا تھا، جس میں انہوں نے کہا کہ حجاب پہننے والی خواتین کالج جائیں گی، ڈسٹرکٹ کلکٹر، مجسٹریٹ، ڈاکٹر، کاروباری خواتین وغیرہ بنیں گی۔

انہوں نے مزید کہا کہ “اگر ہماری بیٹیاں فیصلہ کرتی ہیں اور اپنے والدین سے کہتی ہیں کہ وہ حجاب پہننا چاہتی ہیں، تو ان کے والدین ان کی حمایت کریں گے۔ دیکھتے ہیں کون انہیں روک سکتا ہے۔

          واضح رہے کہ بھارت میں گذشتہ کئی دنوں سے لڑکیوں کے تعلیمی اداروں میں حجاب پر پابندی کے بعد سے کشیدگی برقرار ہے جبکہ بھارتی ریاست کرناٹک نے لڑکیوں کے حجاب پہننے پر حکومتی پابندی کو برقرار رکھا ہے۔

کرناٹک ریاست کے ہائی کورٹ نے طالبات کی جانب سے حجاب پہننے کی اجازت طلب کرنے کے کیس میں فیصلہ سناتے ہوئے لڑکیوں کو حجاب پہننے سے روک دیا تھا۔

دوسری جانب ایک طالبہ نے ہائی کورٹ کے حجاب پر پابندی کے فیصلے کے خلاف سپریم کورٹ میں اپیل دائر کی تھی جسے سپریم کورٹ نے فوری سماعت سے روک دیا تھا۔