کینیڈین وزیراعظم جسٹن ٹروڈو نے صوبائی رہنماؤں سے مشاورت کے بعد مظاہرین سے نمٹنے کے لیے ایمرجنسی نافذ کردی۔

کینیڈا سے امریکا جانے والے ٹرک ڈرائیوروں کے لیے لازمی کورونا ویکسین کے قانون کے خلاف گزشتہ ماہ کے آخر میں شروع والے احتجاجی مظاہروں کی وجہ سے دارالحکومت اوٹاوا میں معمولات زندگی انتہائی متاثر ہوئے ہیں۔

مظاہرین کورونا وبا کے حوالے سے نافذ تمام پابندیوں کو ختم کرنے کا مطالبہ کر رہے ہیں۔ اپنے مطالبات پر زور دینے کے لیے انہوں نے اوٹاوا شہر کے مرکز سمیت کئی اہم بین الصوبائی شاہراہوں پر دھرنا دے رکھا ہے۔

صورتحال کے مدنظر وزیراعظم جسٹن ٹروڈو نے صوبائی رہنماؤں سے گزشتہ روز مشاورت کے بعد قوم سے خطاب کرتے ہوئے ہنگامی حالت نافذ کرنے کا اعلان کیا۔

انہوں نے کہا کہ وفاقی حکومت نے رکاوٹوں اور دھرنوں کو ختم کرنے کے مقصد سے ایمرجنسی قانون کو نافذ کرنے کا فیصلہ کیا ہے۔ انہوں نے واضح کیا کہ یہ اقدامات محدود وقت، مخصوص علاقوں اور کینیڈا کے عوام کو محفوظ رکھنے کے لیے ہیں۔

I want to be very clear about what we are – and are not – doing by invoking the Emergencies Act, and how taking this step will help get the situation under control. In case you missed our announcement earlier today, watch this: pic.twitter.com/htGmZH09Jd

— Justin Trudeau (@JustinTrudeau) February 15, 2022

جسٹن ٹروڈو نے مزید کہا کہ ان رکاوٹوں کی وجہ سے ملکی معیشت کو نقصان پہنچ رہا ہے اور عوام کی سلامتی خطرے میں پڑ گئی ہے۔ اس طرح کی غیرقانونی اور خطرناک سرگرمیوں کو جاری رکھنے کی اجازت نہیں دی جا سکتی۔

 کینیڈین آئین کا ایمرجنسی ایکٹ وفاقی حکومت کو اختیار دیتا ہے کہ وہ ہنگامی حالات میں صوبوں کے اختیارات حذف کرتے ہوئے حالات سے نمٹنے کے لیے خصوصی لیکن محدود وقتی اقدامات کر سکتی ہے۔

یہ ایمرجنسی قانون 1988ء میں بنایا گیا تھا اور اسے صرف غیرمعمولی حالات میں اُس وقت نافذ کیا جاسکتا ہے جب دیگر قوانین اور ضابطے صورتحال پر قابو پانے میں مؤثر ثابت نہ ہو سکیں۔

یہ قانون پولیس کو زیادہ اختیارات دیتا ہے اور وہ غیرقانونی احتجاجی مظاہروں سے نمٹنے کے لیے زیادہ وسائل کا استعمال کر سکتی ہے۔ یہ قانون پورے ملک کا احاطہ کرتا ہے تاہم فی الحال اسے صرف متاثرہ علاقوں میں نافذ کیا جائے گا۔

ٹرک ڈرائیوروں کے احتجاج کی وجہ سے اونٹاریو کو امریکی شہر ڈیٹرائٹ سے جوڑنے والا ایمبیسیڈر پل ایک ہفتے تک بند رہا تھا جسے اتوار کے روز پولیس کی مداخلت پر کھولا گیا۔

خبر رساں ادارے روئٹرز کے مطابق کینیڈین پارلیمنٹ سات روز میں ایمرجنسی کے نفاذ کی توثیق کرے گی اور اسے ایمرجنسی کے نفاذ کو رد کرنے کا اختیار بھی ہے۔