پہلے لوگ صحت مند رہنے کے لیے سائیکل چلایا کرتے تھے مگر اب دنیا بھر میں بڑھتی ماحولیاتی آلودگی اور موسمیاتی تغیرات کا مقابلہ بھی سائیکل چلا کر ہی کیا جائے گا۔

جی ہاں! اِسی حوالے سے دنیا کے 193 ممالک نے اقوام متحدہ کی جنرل اسمبلی میں ایک قرارداد متفقہ طور پر منظور کر لی ہے جس کے تحت آلودگی اور موسمیاتی یا ماحولیاتی تبدیلیوں کا مقابلہ کرنے کے لیے لوگوں میں سائیکل چلانے کے رجحان کو فروغ دیا جائے گا۔

فرانس کی خبر رساں ایجنسی اے ایف پی کے مطابق اقوام متحدہ میں یہ قرارداد ترکمانستان کی جانب سے پیش کی گئی تھی تاہم رکن ممالک کے لیے جنرل اسمبلی سے مںظور کی گئی دیگر قراردادوں کی طرح اس قرارداد پر بھی عمل درآمد کرنا لازمی نہیں ہے۔

قرارداد میں اقوام متحدہ کے رکن ملکوں کو تجویز دی گئی ہے کہ ترقی یافتہ اور ترقی پذیر ممالک کے شہری اور دیہی علاقوں کی پبلک ٹرانسپورٹ میں سائیکل کو بھی شامل کیا جائے۔

اقوام متحدہ کی قرارداد کے مطابق سڑک پر سائیکل چلانے والوں کے لیے حفاظتی اقدامات کو بڑھانے اور بائیک کی سواری کے فروغ سے دیرپا ترقی اور گرین ہاؤس گیسوں کے اخراج میں کمی کا عالمی ہدف حاصل کیا جا سکتا ہے۔

ترکمانستان نے اپنی پیش کردہ قرارداد کے ذریعے تجویز دی ہے کہ دنیا بھر میں جب بھی اور جہاں بھی عالمی، علاقائی اور ملکوں کی قومی ترقی کی پالیسی اور پروگرام مرتب کیے جائیں ان میں سائیکل چلانے کے رجحان کو فروغ دینے کے لیے خصوصی اقدامات کیے جائیں۔

خیال رہے کہ ماحولیاتی ماہرین عالمی سطح پر درجہ حرارت کے بڑھنے کی وجہ گرین ہاؤس گیسوں کے اخراج میں روز افزوں اضافے کو قرار دیتے ہیں۔ دنیا بھر میں ماحولیاتی آلودگی کے باعث ہونے والی موسمیاتی تبدیلیوں سے کئی ممالک کو مختلف نوعیت کے سنگین چیلنجز درپیش ہیں۔

تو پھر آپ کب سے کار چھوڑ کر سائیکل چلانا شروع کر رہے ہیں؟