اسرائیلی صدر تعلقات کو بہتر بنانے کے لیے   14 برس بعد ترکی پہنچ گئے۔

بین الاقوامی خبررساں ادارے کے مطابق اسرائیلی  صدر اسحاق ہرزوگ 2008 کے بعد ترکی کا دورہ کرنے والے پہلے اسرائیلی صدر ہیں ۔

ان کے دورے کے موقع پر ترک صدر رجب طیب اردگان نے کہا ہے کہ وہ اپنی بات چیت میں ترک  اسرائیل تعلقات کے تمام پہلوؤں کا جائزہ لیں گے۔

ہرزوگ نے ترکی روانگی سے قبل ​​تل ابیب کے بین گوریون ایئر پورٹ پر صحافیوں سے گفتگو کرتے ہوئے کہا کہ ہم ہر چیز پر متفق نہیں ہوں گے۔

اسرائیلی صدر نے کہا کہ  اسرائیل اور ترکی کے درمیان تعلقات میں حالیہ برسوں میں یقینی طور پر اتار چڑھاؤ آئے ہیں اور  یہ اتنے آسان لمحات نہیں ہیں   لیکن ہم اپنے تعلقات کو دوبارہ شروع کرنے اور انہیں پیمائش اور محتاط انداز میں استوار کرنے کی کوشش کریں گے۔

واضح رہے کہ ترکی اور اسرائیل کے تعلقات کی دلچسپی کا ایک خاص شعبہ قدرتی گیس ہے۔

اردگان کا کہنا ہے کہ یہ دورہ ایک  نئے دور کا آغاز کرے گا۔

ترک صدر کا کہنا ہے کہ  20 سال قبل زیر بحث  آئے معاملے کے مطابق  دونوں ممالک اسرائیل کی قدرتی گیس کو یورپ تک لے جانے کے لیے مل کر کام کر سکتے ہیں۔

حالیہ روس یوکرین جنگ کے باعث  گیس بحران میں بحیرہ روم سے گیس کی فراہمی یورپی یونین کے  روسی گیس پر انحصار کو کم کر سکتی ہے۔

گیس بحران یوکرین پر روس کے حملے کے بعد ایک گرما گرم موضوع ہے اور یورپی رہنماؤں کی طرف سے روسی گیس پر یورپ کا انحصار کم کرنے کے بیانات بھی سامنے آئے ہیں۔

ترکی کے علاوہ  مشرقی بحیرہ روم سے یورپ تک زیر سمندر پائپ لائن کے منصوبے  رواں برس جنوری میں امریکا کی طرف سے شکوک و شبہات کے اظہار کے بعد رک گئے تھے۔

ترکی کے ایک سینئر اہلکار نے کہا  ہے کہ روس کے یوکرین پر حملے نے مارکیٹ میں توانائی کے ذرائع کو متنوع بنانے کی ضرورت کو ظاہر کیا ہے۔