یوکرائن کے فوجی حکام نے دعویٰ کیا ہے کہ روسی افواج نے دارالحکومت کیف پر دوبارہ حملہ شروع کر دیا ہے۔

یوکرائن کی مسلح افواج کے جنرل اسٹاف کی جانب سے ایک فیس بک پوسٹ میں خبردار کیا گیا ہے کہ کیف کے ارد گرد حالات بدستور کشیدہ ہیں۔

پوسٹ میں کہا گیا ہے روسی فوجی عسکری اور سویلین اہداف پر گولہ باری جاری رکھے ہوئے ہیں۔

پوسٹ میں روس کی جانب سے ریپبلک آف بیلا روس کے اعلیٰ تربیت یافتہ فوجی یونٹوں کو اپنے ساتھ شامل کرنے اور بیلا روس کی فضائی حدود کو یوکرائن پر فضائی حملوں کے لیے استعمال کرنے کا دعویٰ بھی کیا گیا ہے۔

گزشتہ روز امریکی محکمہ خارجہ کے بیان کے مطابق ابھی تک بیلا روس کے فوجیوں کی نقل و حرکت کے کوئی اشارے نہیں ملے ہیں۔

دوسری جانب مشرقی یوکرائن میں علیحدگی پسندوں کے زیر دست علاقے ڈونیسک میں آج یوکرائنی فوج کی جانب سے گولہ باری کی اطلاعات موصول ہوئی ہیں۔ صوبائی حکام کا کہنا ہے کہ وہاں ہونے والی تباہی یوکرائن کی گولہ باری کا نتیجہ ہے۔

گزشتہ روز ڈونیسک صوبے کے قصبے ہورلیوکا میں عوام نے ایک اسکول کی دو خواتین اساتذہ کی آخری رسومات ادا کیں۔ دونوں خواتین اساتذہ یوکرائن کی گولہ باری کے نتیجے میں ہلاک ہو گئی تھیں۔

اس صوبے میں رہنے والے روسی زبان بولتے ہیں۔ شیلنگ کے بعد یہاں ہر جانب تباہ حال گھروں کا ملبہ اور جلی ہوئی کاریں نظر آ رہی ہیں جبکہ صوبے کے کئی اضلاع کو بجلی کی فراہمی بھی جزوی طور پر منقطع ہو گئی ہے۔