سری نگر: مقبوضہ کشمیر میں بھارتی فوج کی ریاستی دہشت گردی میں مزید تین کشمیری نوجوان شہید ہوگئے ہیں۔

کشمیر میڈیا سروس کی رپورٹ کے مطابق بھارت کے غیر قانونی طور پر زیر قبضہ جموں و کشمیر میں بھارتی فوجیوں نے اپنی ریاستی دہشت گردی کی تازہ کارروائی کے دوران آج پلوامہ اور سری نگر اضلاع میں مزید تین کشمیری نوجوانوں کو شہید کردیا ہے۔

بھارتی فوجیوں نے دو نوجوانوں کو ضلع پلوامہ کے علاقے بٹ پورہ نائنہ میں محاصرے اور تلاشی کی کارروائی کے دوران شہید کیا ہے۔

بھارتی فوجیوں نے ایک اور نوجوان کو سری نگر کے علاقے حضرت بل میں تلاشی اور آپریشن کے دوران شہید کیا ہے۔

یہ بھی پڑھیں: خواتین کا عالمی دن؛ مقبوضہ کشمیر میں 22 ہزار سے زائد خواتین بیوہ اور درجنوں نظر بند

انتظامیہ نے علاقے میں موبائل انٹرنیٹ سروس بھی معطل کر دی ہے جبکہ بھارتی فورسز نے صحافیوں کو بھی علاقے میں جانے کی اجازت نہیں دی ہے۔

واضح رہے کہ مقبوضہ کشمیر میں بھارتی فوج کی جارحیت جاری میں جس میں اب تک اس ماہ کے دوران 8 کشمیریوں کو شہید کر دیا گیا ہے۔

یہ بھی پڑھیں:  مقبوضہ کشمیر میں غیر قانونی آبادیاتی تبدیلیوں پر گہری تشویش ہے، وزیر خارجہ

اس کے علاوہ 407 کشمیری نوجوانوں کو گرفتار کیا گیا اور 3 خواتین کے ساتھ جنسی زیادتی کی گئی ہے۔