روسی افواج نے یوکرین کے شہر خیرسون پر قبضہ کرلیا ہے۔ مقامی حکام نے تصدیق کی ہے کہ ایک ہفتہ قبل روس کے حملے شروع ہونے کے بعد یہ پہلا بڑا شہر ہے جس کا کنٹرول روس نے سنبھال لیا ہے۔

فرانسیسی خبر رساں ایجنسی اے ایف پی کے مطابق علاقائی انتظامیہ کے سربراہ گیناڈی لخوتا نے گزشتہ رات میسجنگ سروس ٹیلی گرام پر شہر پر قبضے کی تصدیق کرتے ہوئے لکھا کہ روسی قابض شہر کے تمام حصوں میں موجود ہیں۔

بحیرہ اسود کے قریب واقع 2 لاکھ 90 ہزار آبادی پر مشتمل اسٹریٹجک بندرگاہ کے حامل شہر خیرسون کا روسی افواج نے دو روز سے محاصرہ کر رکھا تھا۔ شہر کے میئر ایگور کولیخائف نے روسی فوج کے ساتھ مذاکرات کا اعلان کیا تھا۔

یوکرین کے اخبار کیف انڈیپینڈنٹ نے ایک ٹویٹ میں میئر ایگور کولیخائف کے حوالے سے بتایا ہے کہ شہر کی صورتحال انتہائی کشیدہ ہے، روسی افواج شہر میں داخل ہو چکی ہیں اور انتظامی اداروں کی عمارات پر قبضہ کر رہی ہیں۔

⚡️Kherson Mayor Kolykhaev: “The city is surrounded.”

According to Kherson mayor Igor Kolykhaev, the situation in the southern regional capital is tense with Russian troops entering the city and taking administrative buildings.

— The Kyiv Independent (@KyivIndependent) March 2, 2022

میئر کولیخائف کے مطابق وہ شہر کو محفوظ بنانے کے لیے کام کر رہے ہیں اور حملے کے نتائج سے نمٹنے کی کوشش کر رہے ہیں۔ انہوں نے کہا کہ اُنہیں لاشوں کو دفنانے، خوراک اور ادویات کی ترسیل میں کافی مشکلات کا سامنا ہے۔

دوسری جانب اقوام متحدہ کی پناہ گزین ایجنسی نے آج بتایا ہے کہ روس کے حملے کے بعد سے ایک ہفتے میں 10 لاکھ افراد یوکرین سے نقل مکانی کر چکے ہیں۔

"I have worked in refugee crises for almost 40 years and I have rarely seen such an incredibly fast exodus of people."

High Commissioner @FilippoGrandi addresses @UN Security Council as a sixth night of anguish falls over Europe https://www.bolnews.com/urdu/world/2022/03/660419/amp/ pic.twitter.com/bsct9ySLZh

— UNHCR, the UN Refugee Agency (@Refugees) March 1, 2022

اقوام متحدہ کے ہائی کمشنر برائے مہاجرین فلیپو گرانڈی نے ٹویٹ میں لکھا کہ صرف سات دنوں میں ہم نے یوکرین سے 10 لاکھ پناہ گزینوں کی ہمسایہ ممالک کی جانب نقل مکانی دیکھی ہے۔

اقوام متحدہ کی جنرل اسمبلی نے گزشتہ روز بھاری اکثریت سے ایک قرارداد منظور کی تھی جس میں روس کے یوکرین سے فوری طور پر انخلا کا مطالبہ کیا گیا تھا۔