روسی وزیر خارجہ  سرگئی لاروف کا کہنا ہے کہ روس  یوکرین کو کسی صورت جوہری ہتھیار حاصل نہیں کرنے دے گا۔

بین الاقوامی خبرر ساں ادارے کے مطابق روسی خبر رساں ادارے (تاس) نے وزیر خارجہ سرگئی لاروف کے حوالے سے کہا کہ روس یوکرین کو جوہری ہتھیار حاصل کرنے کی اجازت نہیں دے گا۔

روس نے گزشتہ ہفتے یوکرین پر حملہ شروع کیا تھا جس میں اس نے یوکرین کو غیر عسکری کرنے کے لیے ایک خصوصی آپریشن کا نام دیا تھا جسے کیف اور یورپی ممالک  نے پروپیگنڈے کے طور پر مسترد کر دیا تھا۔

دوسری جانب اقوام متحدہ  نے کہا ہے کہ یوکرین پر گزشتہ جمعرات سے شروع ہونے والے روسی حملوں میں اب تک کم از کم 136 شہری ہلاک ہوئے ہیں جن میں 13 بچے بھی شامل ہیں۔

اقوامِ متحدہ کے اعداد وشمار کے مطابق اب تک کی لڑائی میں 400 یوکرینی شہری زخمی بھی ہوئے ہیں۔

تاہم اقوام متحدہ کے مہاجرین کی فلاح کے ذیلی ادارے یو این ایچ سی آر کی ترجمان لز تھروسل نے خدشہ ظاہر کیا ہے کہ مرنے والے یوکرینی شہریوں کی اصل تعداد کہیں زیادہ ہو سکتی ہے۔

یو این ایچ سی آر کی ترجمان کا کہنا تھا کہ زیادہ تر ہلاکتیں گولہ باری، فضائی حملوں اور بڑے بم حملوں میں ہوئی ہیں۔

یوکرین کی حکومت کی جانب سے جاری کیے گئے اعداد و شمار کے مطابق اب تک 352 شہری ہلاک اور 1684 زخمی ہو چکے ہیں۔