یوکرین پر حملے کی سزا کے طور پر اب امریکا اور اس کے مغربی حلیف روس کو جی 20 اقتصادی گروپ سے بے دخل کرنے پر غور کر رہے ہیں۔

خبر رساں ایجنسی روئٹرز کے مطابق اِس حوالے سے بات چیت میں شریک ذرائع نے آج بروز بدھ بتایا ہے کہ اگرچہ گروپ میں موجود دیگر ممالک مثلا بھارت اور چین وغیرہ کی جانب سے اس اقدام کو مسترد کیے جانے کا قوی امکان ہے تاہم اس کے باوجود معاملے پر گفت و شنید جاری ہے۔

گروپ میں شامل ایک سینیئر عہدے دار کا کہنا ہے کہ اگر روس کو گروپ سے باہر کیا گیا تو جی 20 تنظیم کی افادیت کم ہو جائے گی۔

گروپ کے ایک اور ذمے دار کے مطابق یہ بات خارج از امکان ہے کہ گروپ میں انڈونیشیا، بھارت، برازیل، چین اور جنوبی افریقا جیسے رکن ممالک روس کو بے دخل کرنے پر راضی ہو جائیں گے۔

ایک اور ذمے دار کے نزدیک روس کو جی 20 تنظیم سے خارج کرنا ناممکن ہے، سادہ سی بات ہے کہ روس کو رکنیت سے محروم کرنے کے لیے کوئی ضابطہ موجود نہیں۔

یورپی یونین کے ذرائع کے مطابق جی 20 تنظیم کے موجودہ سربراہ انڈونیشیا کو آگاہ کر دیا گیا ہے کہ مستقبل میں وزراء کی سطح پر ہونے والے اجلاسوں میں روس کی شرکت یورپی ممالک کے لیے بڑی مشکل کا سبب ہوگی۔

اس سے قبل گزشتہ شام وائٹ ہاؤس میں صحافیوں سے گفتگو کرتے ہوئے امریکی قومی سلامتی کے مشیر جیک سلیوان نے باور کرایا کہ بین الاقوامی اداروں اور عالمی برادری میں روس کے لیے اُمور حسبِ معمول نہیں رہ سکتے۔

یاد رہے کہ روس نے 24 فروری کو یوکرین میں عسکری آپریشن کا آغاز کیا تھا اور آج اس آپریشن کا 28 واں روز ہے۔