یوکرین نے دعویٰ کیا ہے کہ جنگ کے دوران روس کے 14 ہزار سے زائد فوجی مارے گئے ہیں۔

برطانوی میڈیا کی رپورٹ کے مطابق یوکرین کی وزارت دفاع نے کہا ہے کہ تنازع شروع ہونے کے بعد سے اب تک ایک اندازے کے مطابق 14 ہزار 200 روسی فوجی مارے جا چکے ہیں۔

ہر طرف سے ہونے والی ہلاکتوں کی صحیح تعداد کا تعین کرنا مشکل ثابت ہوا ہے، جس میں روس اور یوکرین دونوں نے مختلف  تعداد اور نقصانات کا دعویٰ کیا ہے۔

یہ بھی پڑھیں: روسی صدر پیوٹن کا500 غیر ملکی طیارے واپس کرنے سے انکار

 3 مارچ کو روس نے دعویٰ کیا تھا کہ اس کے 498 فوجی لڑائی میں مارے گئے ہیں، لیکن اس کے بعد سے اس نے مزید اعداد و شمار جاری کرنے کے بارے میں خاموشی اختیار کر رکھی ہے۔

امریکی حکام نے جمعرات کو کہا کہ روسی ہلاکتوں کی تعداد 7 ہزار سے زیادہ ہو سکتی ہے جبکہ  14 ہزار فوجی زخمی ہو سکتے ہیں۔

روسی ہتھیاروں اور گاڑیوں کو پہنچنے والے دیگر نقصانات کے علاوہ یوکرین نے روسی افواج کے کئی ہتھیاروں اور گاڑیوں کو قبضے  میں  لینے کا بھی دعویٰ کیا ہے  جس میں 450 ٹینک 93 طیارے اور 112 ہیلی کاپٹرز شامل ہیں۔