سعودی ولی عہد نے مسجد قباء کے لیے شاہ سلمان توسیعی منصوبے کا اعلان  کردیا۔

عرب میڈیا کی رپورٹ کے مطابق  سعودی ولی عہد شہزادہ محمد بن سلمان بن عبدالعزيز آل سعود نے مدینہ منورہ میں مسجد قباء کی تاریخ کی سب سے بڑی توسیع شروع کرنے کا اعلان کیا ہے۔

اس توسیع کے دوران میں مسجد کے اطراف اور نواح میں ترقیاتی کام بھی شامل ہے۔ توسیعی منصوبے کو خادم حرمین شاہ سلمان بن عبدالعزيز کے نام سے موسوم کیا گیا ہے۔

نئی توسیع کے ذریعے مسجد کا مجموعی رقبہ 10 گُنا بڑھ کر 50 ہزار مربع میٹر ہو جائے گا۔ مسجد کا موجودہ رقبہ 5 ہزار مربع میٹر ہے۔

اس طرح توسیع کے بعد مسجد میں نمازیوں کی گنجائش 66 ہزار  افراد تک پہنچ جائے گی۔  مسجد قباء سن  ایک ہجری میں بنائی گئی تھی۔

سعودی ولی عہد نے یہ اعلان گزشتہ روز مدینہ منورہ کے دورے میں مسجد قباء میں نماز ادا کرنے کے موقع پر کیا۔

شہزادہ محمد بن سلمان نے واضح کیا کہ یہ توسیعی منصوبہ مملکت کے پروگرام ویژن 2030 کے اہداف اور مقاصد کو مکمل کرنے کا حصہ ہے۔

توسیع کے منصوبے میں مسجد قباء کے اطراف اور نواح میں واقع علاقوں اور تاریخی مقامات پر بھی ترقیاتی کام شامل ہیں۔ یہ کُل 57 مقامات ہیں جن میں کئی کنوئیں ، کھیت ، باغ اور رسول اللہ ﷺ کے زیر استعمال تین راستے ہیں۔

اسلامی تاریخ کی پہلی مسجد کا اعزاز رکھنے والی مسجد قباء کو تاریخ کے ادوار میں فن تعمیر اور توسیع کے حوالے سے اہمیت حاصل رہی ہے۔

اس کا آغاز عہدِ نبوی  ﷺ  سے ہوا اور پھر خلفائے  راشدین کے ادوار ، اموی اور عباسی ادوار سے گزرتا ہوا موجودہ مملکت سعودی عرب کے قیام پر اختتام پذیر ہوا۔

اس آخری دور میں شاہ عبدالعزیز آل سعود سے لے کر ان کے فرماں روا بیٹوں تک یہ سلسلہ جاری ہے۔