سعودی عرب سمیت دیگر خلیجی ممالک میں آج عید الفطر منائی جارہی ہے جبکہ برطانیہ، کینیڈا اور یورپی ممالک بھی آج عید الفطر منائیں گے۔

گذشتہ روز سعودی عرب میں چاند نظر آنے کے بعد آج مملکت میں عید الفطر منائی جارہی ہے جبکہ مسجد الحرام میں آج عید الفطر کی نماز ادا کی گئی جس میں شاہ سلمان اور ولی عہد محمد بن سلمان سمیت گورنر مکہ نے شرکت کی۔

مسجد نبوی ﷺ میں بھی آج عید الفطر کی نماز ادا کی گئی جس میں بڑی تعداد میں لوگوں نے شرکت کی جبکہ مسجد قبلتین اور مسجد قباء میں بھی عید کی نماز ادا کی گئی۔

عید الفطر کے موقع پر دو سال بعد آج سعودیہ عرب کی مساجد اور امام بارگاہوں میں مکمل گنجائش کے ساتھ عید کی نماز ادا کی گئی ہے۔

          طویل عرصے بعد آج برطانیہ میں بھی ایک ہی دن عید منائی جائے گی جس پر مسلم کمیونٹی کافی خوش دکھائی دے رہے ہیں جبکہ چاند رات پر ایشیائی بازاروں میں کافی گہما گہمی اور رش دیکھا گیا ہے۔

علاوہ ازیں امریکہ، کینیڈا اور یورپی ممالک میں بھی آج عید منائی جائے جبکہ بھارت، بنگلادیش اور سری لنکا میں کل عید ہوگی۔

دوسری جانب پڑوسی ملک افغانستان میں گذشتہ روز ہی عید الفطر منائی جاچکی ہے ، طالبان حکومت نے یکم مئی بروز اتوار کو ملک بھر میں عید الفطر منانے کا اعلان کیا تھا۔

واضح رہے کہ چاند کی رویت دیکھنے کے لیے گذشتہ روز پاکستان میں بھی مرکزی رویت ہلال کمیٹی کا اجلاس منعقد ہوا تھا جس نے چاند نظر نہ آنے کا اعلان کیا تھا۔

مرکزی رویت ہلال کمیٹی کا کہنا تھا کہ ملک بھر میں آج مطلع صاف تھا، کسی بھی علاقے سے چاند کی کوئی مصدقہ شہادت موصول نہیں ہوئی ہے، عید الفطر 3مئی بروز منگل کو منائی جائے گی۔

تاہم صوبہ خیبر پختونخوا میں آج سرکاری سطح پر عید الفطر منائی جارہی ہے جبکہ آج صوبے کی بیشتر مساجد میں عید کی نماز بھی ادا کردی گئی ہے۔