اردن کے عقبہ نامی بندرگاہ میں ایک اسٹوریج ٹینک سے زہریلی گیس کے اخراج ہونے کی وجہ سے 12 افراد جاںبحق اور 251 زخمی ہوگئے۔

خبر ایجنسی کے مطابق یہ واقعہ زہریلی گیس سے بھرے ٹینک کی نقل وحمل کے دوران گرنے کے بعد پیش آیا جس نے پوری بندرگاہ کو اپنی لپیٹ میں لے لیا جس کے نتیجے میں 12 افراد جاںبحق اور 251 زحمی ہوگئے تاہم 199 متاثرین اب بھی اسپتال میں زیرعلاج ہیں جن کی حالت تشویشناک ہے۔

سیکیورٹی اور ریسکیو اہلکاروں نے واقعے کی اطلاع ملتے ہی فوری طور پر جائے وقوعہ پر پہنچ کر زخمیوں اور جاں بحق افراد کو اسپتال منتقل کیا اور علاقے کو سیل کردیا۔

اردن کی سرکاری خبر رساں ایجنسی نے بتایا کہ زہریلی گیس کے اخراج کے بعد بندرگاہ کے متاثرہ حصے پر کام روک دیا گیا اس کے علاوہ عقبہ کے جنوب میں سیاحتی مقام کو بھی خالی کرالیا گیا ہے۔

بندرگاہ سے لوگوں کے انخلا کے لیے طیارے بھیج دیے گئے ہیں، جبکہ خصوصی ٹیمیں گیس لیکیج سے نمٹنے کے لیے کام کر رہی ہیں۔

سرکاری حکام نے شہریوں کو ہدایت دی ہے کہ گھروں کی کھڑکیاں بند رکھیں اور گھر سے باہر نہ نکلیں۔

اس حوالے سے عقبہ کے محکمہ صحت کا کہنا ہے کہ ٹینک سے خارج ہونے والی گیس کلورین ہے اور یہ ایک انتہائی زہریلا مادہ ہے، جو آس پاس کے علاقوں کو نمایاں طور پر متاثر کر سکتا ہے۔

عقبہ کے محکمہ صحت نے بتایا کہ اس گیس سے انسانی جسم پر لگنے سے جھلیوں میں جلن اور گوشت میں سرخ دانے پڑنے کے ساتھ نمونیا کے علاوہ منہ میں داخل ہونے غذائی نالی میں جلن کا باعث بھی بنتی ہے۔