جرمن وزیر خارجہ اینالینا بیئربوک کا کہنا ہے کہا کہ اگر جرمنی روسی گیس کی درآمدات کو یقینی بنانے کے لیے روس پر عائد پابندیوں میں نرمی کرتا ہے تو پھر اسے دگنا بلیک میل کیا جائے گا۔ خیال رہے کہ بعض جرمن اپوزیشن جماعتوں نے روس پر پابندیوں میں نرمی کا مطالبہ کیا ہے۔

بریمن شہر میں عام لوگوں سے بات کرتے ہوئے جرمن وزیر خارجہ اینالینا بیئربوک نے روس پر عائد پابندیوں میں نرمی کے کسی امکان کو مسترد کر دیا۔ انہوں نے کہا کہ اگر جرمنی پابندیوں میں نرمی کرتا ہے تو پھر اسے آگے چل کر دگنا بلیک میل کیا جائے گا۔

بیئربوک نے اس حوالے سے دلیل پیش کرتے ہوئے کہا کہ یہ تو ان تمام لوگوں کو ایک دعوت دینے کے مترادف ہو گا جو انسانی حقوق، آزادی اور جمہوریت کو پامال کرتے ہیں کیونکہ روس نے تو بین الاقوامی قانون کو انتہائی وحشیانہ طریقے سے توڑا ہے۔

جرمن وزیر خارجہ نے کہا کہ جرمنی یوکرین کی حمایت جاری رکھے گا جب تک اسے ہماری ضرورت ہو گی اور اسی لیے ہم ان پابندیوں کو بھی برقرار رکھیں گے اور ساتھ ہی ہم یقینی بنائیں گے کہ اس معاملے پر جرمن معاشرہ تقسیم نہ ہونے پائے۔

اس سے قبل بائیں بازو کی سیاسی جماعت ڈائی لنکے اور انتہائی دائیں بازو کی سیاسی جماعت آلٹرنیٹیو فار جرمنی (اے ایف ڈی) کے بعض اراکینِ پارلیمنٹ نے جرمن معیشت پر دباؤ کو کم کرنے کے لیے روس پر عائد پابندیوں میں نرمی کا مطالبہ کیا تھا۔ واضح رہے کہ جرمنی میں صنعتی اور گھریلو سطح پر روسی گیس پر بہت زیادہ انحصار کیا جاتا ہے۔