رواں برس خطبہ حج ڈاکٹر محمد بن عبدالکریم العیسیٰ دیں گے۔

عرب میڈیا رپورٹ کے مطابق خادم حرمین شریفین شاہ سلمان بن عبدالعزیز آل سعود نے ڈاکٹر محمد بن عبدالکریم  العیسیٰ کو حج 2022 کے لیے خطیب مقرر کیا ہے۔

 حرمین شریفین کے آفیشل اکاؤنٹ کی جانب سے کی گئی پوسٹ میں بتایا گیا ہے کہ ڈاکٹر محمد بن عبدالکریم 9 ذوالحجہ کو عرفات کی ‘مسجد النمرۃ’ میں حج کا خطبہ دیں گے۔

پوسٹ کے مطابق شیخ محمد بن عبدالکریم العیسیٰ مسلم ورلڈ لیگ کے سیکرٹری جنرل کے ساتھ آرگنائزیشن آف مسلم اسکالرز کے صدر کے عہدے پر بھی فائز ہیں۔

یاد رہے کہ گزشتہ سال خادم حرمین شریفین کی جانب سے مسجد الحرام کے خطیب ڈاکٹر بلیلہ کو وقوفِ عرفہ میں خطبے کے لیے  مقرر کیا گیا تھا۔

واضح رہے کہ اس سال کا حطبہ حج انگریزی اور اردو سمیت 14 زبانوں میں براہ راست نشر کیا جائے گا۔

صدر امور حرمین شریفین شیخ عبدالرحمن السدیس کا کہنا تھا کہ اسلام کا پیغام پوری دنیا میں موجود سامعین تک پہنچانے کے لیے خطبہ حج 14 زبانوں میں نشر ہوگا۔

ان کا کہنا تھا کہ سعودی عرب کی قیادت اعتدال اور رواداری کا پیغام زیادہ سے زیادہ سامعین تک پہنچانا چاہتی ہے۔

10 لاکھ مسلمان فریضہ حج کے لیے مکہ پہنچ گئے

کورونا وائرس کے بعد پہلی بار 10 لاکھ عازمین حج کی سعادت حاصل کریں گے، جن میں ساڑھے آٹھ لاکھ غیرملکی شامل ہیں۔

اس سال غلاف کعبہ یکم محرم کو تبدیل گیا جائے گا

اس سال غلاف کعبہ یکم محرم کو تبدیل کرنے فیصلہ کیا گیا ہے۔

یاد رہے ، اس سے قبل غلاف کعبہ ہر سال 9 ذی الحجہ کو اس وقت تبدیل  کیا جاتا تھا جب اندرون مملکت اور بیرونی دنیا سے حج پر آنے والے میدان عرفات میں وقوف کے لیے جمع ہوتے تھے اور مسجد الحرام میں  زائرین کی تعداد نہ ہونے کے برابر ہوتی تھی۔

منیٰ میں دنیا کی سب سے بڑی خیمہ بستی آباد، مناسک حج کا آغاز آج سے ہوگا

دوسری جانب سعودی عرب میں دنیا بھر سے آئے لاکھوں عازمین حج آج 7 ذی الحجہ کی درمیانی شب میں مکہ مکرمہ سے منیٰ کیلئے روانہ ہوں گے جہاں عازمین کے قیام کیلئے دنیا کی سب سے بڑی خیمہ بستی آباد کردی گئی ہے۔