فلسطین میں قابض اسرائیلی فوج کی فائرنگ سے ایک اور نوجوان شہید ہو گیا۔ یہ افسوسناک واقعہ مغربی کنارے میں جمعہ کے روز ایک تصادم کے دوران پیش آیا ہے۔ فلسطینی وزارت صحت نے 16 سالہ نوجوان کی شہادت کی تصدیق کر دی ہے۔

ایک خبر رساں ادارے کے نمائندے کے مطابق 300 سے 400 فلسطینی ایک احتجاجی مظاہرے کے لیے جمع تھے۔ یہ احتجاج اس علاقے میں یہودی بستیوں کی تعمیر اور اُن کی اندھا دھند توسیع کے خلاف کیا جا رہا تھا۔ اس دوران یہودی آبادکاروں کے ہمراہ آنے والے اسرائیلی فوجیوں نے فلسطینیوں کو نشانہ بنانا شروع کیا تو دو طرفہ تصادم شروع ہونے پر اسرائیلی فوج نے فائرنگ کر دی۔ فائرنگ کے نتیجے میں 16 سالہ فلسطینی نوجوان امجد نشاط ابوعلیا سینے میں گولی لگنے سے شہید ہو گیا۔

خیال رہے کہ حالیہ دنوں میں نابلوس میں اسی نوعیت کے ایک واقعے کے بعد یہ دوسرا واقعہ ہے۔ نابلوس میں اتوار کے روز صبح سویرے ایک چھاپا مار کارروائی کے دوران اسرائیلی فوجیوں کی فائرنگ سے دو فلسطینی شہید ہو گئے تھے۔ اسرائیلی فوج نے اس واقعے کو مسلح لوگوں کے ساتھ ایک تصادم کا نام دیا تھا۔

رواں سال مارچ کے اواخر سے اب تک کم از کم 53 فلسطینی شہری اسرائیلی فوج کے ہاتھوں جاں بحق ہو چکے ہیں۔ ان میں سے بڑی تعداد میں فلسطینیوں کا تعلق دریائے اردن کے مغربی کنارے سے ہے۔ ان جاں بحق افراد میں امریکی شہری اور الجزیرہ نیوز ٹی وی کی صحافی شیریں ابو عاقلہ بھی شامل ہیں۔