ایران کے لیے امریکا کے خصوصی ایلچی رابرٹ میلی کا کہنا ہے کہ ایرانی مذاکرات کاروں نے کئی نئے مطالبات شامل کر دیے ہیں جو اس بات کا ثبوت ہے کہ ایران جوہری مذاکرات میں سنجیدہ نہیں ہے۔

2015ء کے جوہری معاہدے کو بچانے کی ایک اور کوشش کے طور پر امریکا اور ایران کے مابین گزشتہ ہفتے قطر کے دارالحکومت دوحا میں بالواسطہ مذاکرات کا ایک اور دور ہوا تھا لیکن اس میں کوئی پیشرفت نہیں ہوسکی۔

امریکا کے خصوصی مذاکرات کار رابرٹ میلی نے گزشتہ روز بتایا کہ ایران نے جوہری پروگرام پر حالیہ مذاکرات میں کئی نئے غیرمتعلقہ مطالبات شامل کر دیے جبکہ ہم اس تجویز پر غور کر رہے تھے کہ ایران جوہری معاہدے پر عملدرآمد کے لیے ایک مقررہ وقت کا اعلان کرے تاکہ امریکا ایران کے خلاف عائد پابندیوں کو نرم کرسکے۔

اس سے پہلے مذاکرات کئی ماہ تک تعطل کا شکار رہے تھے۔ ایران امریکا سے مطالبہ کرتا ہے کہ وہ سپاہ پاسداران انقلاب کو دہشت گردوں کی بلیک لسٹ سے نکال دے۔ وہ اس بات کی بھی ضمانت چاہتا ہے کہ مستقبل میں کوئی بھی امریکی انتظامیہ معاہدے سے باہر نہ نکلے جیسا کہ سابق امریکی صدر ڈونلد ٹرمپ نے 2018ء میں کیا تھا۔ امریکا کا کہنا ہے کہ کسی بھی انتظامیہ یا عہدیدار کے لیے اس طرح کی ضمانت دینا ممکن نہیں ہے۔

Had a call w @JosepBorrellF earlier tonight.

Agreement is possible only based on mutual understanding & interests.

We remain ready to negotiate a strong & durable agreement.

US must decide if it wants a deal or insists on sticking to its unilateral demands. Mutually exclusive.

Advertisement

— H.Amirabdollahian امیرعبداللهیان (@Amirabdolahian) July 5, 2022

اُدھر ایرانی وزیر خارجہ حسین امیر ابوللہیان نے یورپی یونین کی خارجہ پالیسی کے سربراہ جوسیپ بوریل کے ساتھ بات چیت کے بعد ٹوئٹر پر اپنے ایک بیان میں کہا کہ معاہدہ صرف باہمی مفاہمت اور مفادات کی بنیاد پر ہی ممکن ہے۔ ہم ایک مضبوط اور پائیدار معاہدے کی خاطر بات چیت کے لیے تیار ہیں لیکن امریکا کو فیصلہ کرنا ہوگا کہ وہ کوئی معاہدہ چاہتا ہے یا اپنے یکطرفہ مطالبات پر ہی رُکے رہنا چاہتا ہے۔

امریکی وزارت خارجہ کے ترجمان نیڈ پرائس نے بتایا کہ فی الحال مذاکرات کا کوئی نیا دور زیرغور نہیں۔ ایران حالیہ مہینوں میں ناقابل قبول مطالبات پیش کرتا رہا ہے۔