گوٹابایا راجا پاکسے کے استعفیٰ کے بعد اب سری لنکا کے نئے صدر کا انتخاب اگلے ہفتے پارلیمان کے اراکین کریں گے۔

خبر ایجنسی کے مطابق سری لنکا کے صدر گوٹابایا راجا پاکسے باضابطہ طور پر مستعفی ہوگئے جس کی تصدیق پارلیمنٹ کے اسپیکر نے کی ہے۔

میڈیا رپورٹ کے مطابق سری لنکن پارلیمنٹ نے اجلاس 16 جولائی کو طلب کیا ہے تاکہ ایک نئی متحدہ حکومت کا قیام عمل میں لایا جاسکے، اس اجلاس میں متعدد سیاسی جماعتیں شامل ہوں گی۔

رپورٹ میں یہ بھی کہا گیا ہے کہ حزب اختلاف کی جماعتوں کی جانب سے سجیتا پریما داسا کو نئے وزیراعظم کے طور پر نامزد کیے جانے کا امکان ہے۔

واضح رہے کہ سری لنکا میں چند ماہ سے جاری معاشی بحران پر حکومت کے خلاف احتجاج شروع ہو گیا تھا اور حالات کو حکومت کی نااہلی کا نتیجہ قرار دیا جا رہا تھا۔

شدید احتجاج کے بعد سری لنکا کے صدر کے نکل جانے کے بعد سری لنکن شہری ان کے استعفے کے اعلان کا انتظار کر رہے تھے۔

جس کے بعد گوٹابایا راجا پاکسے کے استعفیٰ کا رسمی اعلان ٹیلی ویژن خطاب کے دوران پارلیمنٹ کے اسپیکر مہندرا یاپا ابھے وردنے نے آج 15 جولائی کی صبح کیا۔

یاد رہے کہ سری لنکا میں صدارتی نظام 1978 میں رائج ہوا تھا جس کے بعد راجا پکشے ملک کے پہلے صدر ہیں جنہوں نے عہدے سے استعفے دیا۔

خیال رہے 13 جولائی کو صدر گوتابایا راجا پکشے ملک چھوڑ گئے تھے، حکومتی ذرائع نے ان کے مالدیپ پہنچ جانے کی تصدیق کی تھی۔