گستاخانہ بیان دینے والے بی جے پی رہنما ٹی راجہ سنگھ کو گرفتاری کے کچھ دیر بعد ہی رہا کردیا گیا جس کے خلاف بھارت میں مسلمان سراپا احتجاج ہیں۔

بھارتی میڈیا کے مطابق بھارتیہ جنتا پارٹی (بی جے پی) کے رکن اسمبلی ٹی راجہ سنگھ کو پیغبر اسلام ﷺ کے بارے میں گستاخانہ بیان پر گرفتار کیا گیا تھا جس کے بعد ان کی پارٹی رکنیت بھی معطل کردی گئی تھی۔

تاہم گرفتاری کے کچھ دیر بعد ہی انہیں رہا کردیا گیا جس کے خلاف بھارت کے مسلمان سراپا احتجاج ہیں جب کہ تلنگانہ ریاست کے شہر حیدر آباد میں ہزاروں افراد نے ٹی راجہ سنگھ کے خلاف مظاہرہ کرتے ہوئے انہیں گرفتار کرنے کا مطالبہ کیا ہے۔

میڈیا رپورٹس کے مطابق پولیس نے گستاخ رسول ﷺ کے خلاف مظاہرہ کرنے والوں پر تشدد کیا اور متعدد مظاہرین کو بھی گرفتار کرلیا گیا جب کہ اس وقت بھی بھارت کے مختلف شہروں میں احتجاج جاری ہے۔

واضح رہے کہ ٹی راجہ سنگھ نے پیر کی رات ’سری رام چینل تلنگانہ‘ نامی یوٹیوب چینل پر پیغمبر اسلام ﷺ کے خلاف گستاخانہ زبان استعمال کی تھی جب کہ اس ویڈیو کو بعد ازاں چینل سے ہٹادیا گیا تھا۔