لکھنئو: بھارتی ریاست یوپی میں متھرا ریلوے اسٹیشن سے چوری ہونے والا سات ماہ کا بچہ بی جے پی لیڈر کے گھر سے برآمد ہوگیا ہے۔

بھارتی میڈیا کے مطابق گذشتہ ہفتے بھارتی ریاست یوپی کے شہر لکھنئو میں متھرا ریلوے اسٹیشن سے چوری ہونے والا سات ماہ کا بچہ 100 کلو میٹر دور فیروز آباد میں بی جے پی کارپوریٹر کے گھر سے برآمد ہوا ہے۔

پولیس کے مطابق بی جے پی کی ونیتا اگروال اور ان کے شوہر نے بچے کو 1 لاکھ 80 ہزار بھارتی روپے میں دو ڈاکٹروں سے خریدا تھا، یہ ڈاکٹرز ایک بڑے گینگ کا حصہ بتائے جارہے ہیں۔

پولیس کا کہنا ہے کہ ونیتا اگر وال کی پہلے بھی ایک بیٹی ہے اور انہیں بیٹے کی خواہش تھی جب کہ بچے کی چوری میں ملوث تمام آٹھ ملزمان کو گرفتار کرلیا گیا ہے جس میں وہ ملزم بھی شامل ہے جو بچے کو پلیٹ فارم سے اغواء کرکے فرار ہوا تھا۔

متھرا میں ریلوے پولیس نے ایک پریس کانفرنس منعقد کی تھی جس میں پولیس نے مغوی بچے کو اس کی ماں کے حوالے کیا تھا جب کہ اس موقع پر پولیس نے برآمد ہونے والا پیسہ بھی میڈیا کے سامنے پیش کیا۔

ایک تفصیلی بیان میں سینئر پولیس آفیسر محمد مشتاق کا کہنا تھا کہ اس اغواء کی واردات میں وہی گروہ شامل تھا جو رقم کی اسمگلنگ میں بھی ملوث ہے۔

محمد مشتاق کا صحافیوں سے گفتگو کرتے ہوئے کہنا تھا کہ دیپ کمار نامی شخص نے بچے کو اغواء کیا تھا جب کہ اس گروپ میں دو ڈاکٹرز بھی شامل ہیں جو پڑوسی ضلع ہاتھرس میں ایک اسپتال چلاتے ہیں۔

انہوں نے مزید کہا کہ ڈاکٹرز کے ساتھ کچھ دیگر ہیلتھ ورکرز بھی اس گروہ کا حصہ ہیں جب کہ محمد مشتاق نے صحافیوں کو بتایا کہ جن کے گھر سے بچہ برآمد ہوا ان سے پوچھ گچھ کی گئی ہے، ان کی ایک بیٹی تھی اور انہیں بیٹے کی خواہش تھی جس کی وجہ سے انہوں نے یہ معاہدہ کیا تھا۔