چین میں خوفناک بس حادثے میں 27 افراد ہلاک اور 20 زخمی ہوگئے ہیں۔

غیر ملکی خبر رساں ادارے کے مطابق چین کے صوبے گوئیژو کی شاہراہ پر خوفناک حادثہ پیش آیا ہے جس کے نتیجے میں 27 افراد ہلاک اور 20 زخمی ہوگئے ہیں جب کہ گاڑی میں مجموعی طور پر 47 مسافر سوار تھے۔

پولیس کے مطابق ہلاک ہونے والے افراد کے علاوہ دیگر 20 زخمیوں کو طبی امداد فراہم کی جا رہی ہے جب کہ تمام مسافر سرکاری صحت کے ادارے کی گاڑی میں سوار تھے۔

رپورٹ کے مطابق تمام مسافروں کو کووڈ 19 ہونے کی وجہ سے منتقل کیا جارہا تھا کہ گاڑی سینڈو کاؤنٹی کے مقام پر حادثے کا شکار ہوگئی جب کہ علاقہ صوبائی دارالحکومت سے تقریباً 170 کلو میٹر جنوب مشرق میں واقع ہے۔

واضح رہے کہ گوئیژو صوبے میں حالیہ دنوں میں کووڈ 19 کے مریضوں کی تعداد میں اضافہ ریکارڈ کیا گیا ہے۔

سرکاری خبر رساں ادارے کے مطابق حادثے کا شکار ہونے والے گاڑی خصوصی طور قرنطینہ کیے گئے افراد کی نقل و حرکت کے لیے استعمال ہوتی ہے۔

رپورٹس کے مطابق چین کے قومی صحت کمیشن کے اعداد و شمار ظاہر کرتے ہیں کہ اتوار کو گوئژو صوبے میں 712 نئے تصدیق شدہ کووڈ کے کیسز ریکارڈ کیے گئے ہیں جو کہ چین میں تمام نئے کیسز کا 70 فیصد بنتے ہیں۔

دوسری جانب حادثے کے بعد سوشل میڈیا صارفین میں غصہ دیکھنے میں آیا اور چین میں ٹوئٹر جیسی ایپلی کیشن ویبو پر یہ حادثہ زیر بحث بن کر ٹاپ ٹرینڈ کرنے لگا جس کے کچھ ہی دیر بعد یہ ٹرینڈ غائب بھی ہوگیا۔