بنگلادیش میں تیز بارشوں کے بعد پیدا ہونے والے طوفان نے بڑے پیمانے پر تباہی مچادی ہے جس میں 24 افراد کے ہلاک ہونے کی اطلاعات ہیں۔

غیر ملکی خبر رساں ادارے کے مطابق بنگلادیش میں بارشوں اور طوفان نے دارالحکومت ڈھاکہ سمیت کئی بڑے شہروں میں تباہی مچا رکھی ہے۔

رپورٹ کے مطابق بارشوں سے نشیبی علاقے زیر آب آگئے ہیں جب کہ طوفان کے باعث مصروف سڑکوں پر بل بورڈز اور درخت گر گئے ہیں جس کی وجہ سے ٹریفک کا نظام بھی معطل ہوگیا ہے۔

رپورٹ میں کہا گیا ہے کہ کئی علاقوں میں لینڈ سلائیڈنگ کے واقعات بھی رپورٹ ہوئے ہیں جب کہ دارالحکومت کے کئی علاقے نیٹ اور موبائل سروس سے محروم ہوگئے ہیں۔

طوفان اور بارشوں کی وجہ سے وبائی امراض پھوٹنے کا خدشہ ہے جب کہ 24 افراد اب تک جان کی بازی ہارچکے ہیں اور دو درجن سے زائد زخمیوں کو قریبی اسپتال منتقل کیا گیا ہے۔

رپورٹس ہیں کہ ہلاکتوں کی تعداد بڑھنے کا امکان ہے جب کہ زیادہ تر افراد کا لینڈ سلائیڈنگ کے باعث مرنے کا امکان ظاہر کیا جارہا ہے۔

واضح رہے کہ اس سے قبل 9 افراد کی ہلاکت کی تصدیق کی گئی تھی جب کہ موبائل سروس کی بحالی کے بعد ہی درست تعداد سامنے آسکے گی۔