سری نگر: مقبوضہ کشمیر کے ضلع بانڈی پورہ سے بھارتی فورسز نے خاتون سمیت چار کشمیریوں کو گرفتار کرلیا ہے۔

کشمیر میڈیا سروس کی رپورٹ کے مطابق غیر قانونی طور پر بھارت کے زیر قبضہ جموں و کشمیر میں بھارتی فورسز نے ضلع بانڈی پورہ سے ایک خاتون سمیت چار کشمیریوں کوگرفتار کیا ہے۔

پولیس ترجمان کا کہنا ہے کہ بانڈی پورہ پولیس نے بھارتی فوج کی 13 آر آر اور پیراملٹری سینٹرل ریزرو پولیس فورس کے ساتھ مل کر ضلع کے علاقے گنڈبل میں محاصرے اور تلاشی کی کارروائی کیں۔

رپورٹ میں کہا گیا ہے کہ بھارتی پولیس نے محاصرے اور تلاشی کے دوران دو نوجوانوں کو گرفتار کیا ہے جن کی شناخت رکھ حاجن اور عرفات فاروق وگے کے نام سے ہوئی ہے۔

ترجمان نے کہا کہ فورسز کی مشترکہ پارٹی نے ایک اورکارروائی کی جس دوران ایک نوجوان اور ایک خاتون کو گرفتارکرلیا گیا ہے جب کہ ان کی شناخت وانگی پورہ سنبل کے عمران مجید میر اور وہاب پرے محلہ حاجن کی ثریا راشد وانی کے طورپر ہوئی۔

پولیس نے نوجوانوں اورخاتون کی گرفتاری کا جواز فراہم کرنے کے لئے انہیں مجاہدین اوران کے معاون  قرار دیا ہے۔