سابق امریکی صدر نے 2024 میں ہونے والے صدارتی انتخابات کے لیے اپنے کاغذات نامزدگی جمع کروادیے ہیں۔

غیر ملکی خبر رساں ادارے کے مطابق منگل کو ری پبلکن پارٹی میں صدارتی نامزدگی کا آغاز ہوا جب کہ سابق صدر ڈونلڈ ٹرمپ نے اپنے کاغذات نامزدگی امریکی انتخابی اتھارٹی کے پاس جمع کروادیے ہیں۔

ڈونلڈ ٹرمپ کی جلد بازی دیکھ کر یہ خیال کیا جارہا ہے کہ وہ 2024 میں الیکشن لڑنے کے خواہاں دیگر پارٹی لیڈرز پر برتری حاصل کرنا چاہتے ہیں۔

واضح رہے کہ امریکہ میں وسط مدتی الیکشن جاری ہیں جس میں ڈونلڈ ٹرمپ کے نامزد کردہ امیدواروں کی کمزور کارکردگی کی وجہ سے ان کی پارٹی پر گرفت کمزور ہوتی جارہی ہے۔

یہ سوال بھی اٹھنا شروع ہوگئے ہیں کہ کیا ڈونلڈ ٹرمپ اپنی تقسیم پسند اور قانونی پیچیدگیوں کے باوجود درست آدمی ہیں کہ انہیں اگلے الیکشن میں پارٹی کا پرچم تھمایا جائے۔

اس موقع پر ڈونلڈ ٹرمپ کا اپنی رہائش گاہ پر سینکڑوں حامیوں سے خطاب کرتے ہوئے کہنا تھا کہ ’امریکی کی واپسی کا عمل اب شروع ہورہا ہے‘۔

دوسری جانب ڈونلڈ ٹرمپ کے الیکشن میں اترنے کے اعلان کے بعد سوشل میڈیا پر امریکی صدر جوبائیڈن کا بیان بھی سامنے آگیا ہے جس میں ان کا کہنا تھا کہ ’ڈونلڈ ٹرمپ نے امریکہ کو ناکام کیا‘۔

امریکی صدر نے اپنی پوسٹ میں ایک ویڈیو بھی شیئر کی جس میں ڈونلڈ ٹرمپ پر انتہا پسندوں کی پشت پناہی سمیت سنگین الزامات عائد کیے گئے ہیں۔