بھارتیہ جنتا پارٹی کے رکن پارلیمنٹ پرتاب سمہا سے مسجد نما بس اسٹینڈ بھی برداشت نہ ہوا اور اس کو منہدم کرنے کی دھمکی دے دی ہے۔

کشمیر میڈیا سروس کی رپورٹ کے مطابق بھارتی ریاست کرناٹک میں بھارتیہ جنتاپارٹی کے رکن پارلیمنٹ پرتاپ سمہا نے یہ کہہ کر ایک نیا تنازعہ کھڑا کر دیا ہے کہ وہ میسور، اوٹی روڈ پر واقع مسجد نما بس اسٹینڈ کو منہدم کر دیں گے۔

انہوں نے کہا کہ میں نے اسے سوشل میڈیا پر دیکھا ہے، بس اسٹینڈ کے دو چھوٹے اور درمیان میں ایک بڑاگنبد ہے، یہ صرف ایک مسجد ہے۔

ان کا کہنا تھا کہ میں نے انجینئرز سے کہا ہے کہ تین چار دنوں میں اس ڈھانچے کو گرا دیں۔ اگر وہ ایسا نہیں کرتے تو میں بلڈوزر لے کر اسے خود گرا دوں گا۔

دوسری جانب کانگریس نے بی جے پی کے رکن پارلیمنٹ کے اس بیان کو کڑی تنقید کا نشانہ بنایا ہے۔

کرناٹک کانگریس کے سربراہ سلیم احمد نے کہا کہ یہ میسور کے رکن پارلیمنٹ کا احمقانہ بیان ہے۔ انہوں نے سوال کیا کہ کیا وہ ان سرکاری دفاتر کو بھی گرا دیں گے جن کے اوپر گنبد ہیں؟