انڈونیشیا کے جزیرے جاوا میں 6.4 شدت کا زلزلہ محسوس کیا گیا ہے۔

غیر ملکی خبر رساں ادارے کے مطابق انڈونیشیا کا مغربی جزیرہ جاوا زلزلے سے لرز اٹھا ہے جب کہ زلزلے کے جھٹکے سے عمارتوں اور گاڑیوں کے شیشے بھی ٹوٹ گئے ہیں۔

رپورٹ کے مطابق جزیرے جاوا میں آنے والے زلزلے کی گہرائی 118 کلومیٹر (73 میل) ریکارڈ کی گئی ہے۔

یورپی زلزلہ پیما مرکز کے مطابق زلزلے کے جھٹکے انڈونیشیا کے دارالحکومت جکارتہ میں بھی محسوس کیے گئے ہیں۔

رپورٹ میں کہا گیا ہے کہ زلزلے کے جھٹکوں کے بعد لوگ عمارتوں سے باہر نکل آئے تاہم زلزلے سے سونامی کا کوئی امکان نہیں ہے۔

خبر رساں ادارے کا کہنا ہے کہ مالی یا جانی نقصان کی کوئی اطلاع موصول نہیں ہوئی ہے جب کہ حکام صورت حال کا جائزہ لے رہے ہیں۔

جاوا کے رہائشیوں کا سوشل میڈیا پر کہنا ہے کہ ’انہوں نے زلزلے کو شدت سے محصوس کیا، عینی شاہد نے بتایا کہ زلزلے کے بعد ہوٹل میں ٹہرے مسافر بھی باہر نکل آئے تھے۔

انڈونیشیا کے جیو فزکس ایجنسی کے سربراہ دویکوریتا کرناوتی کا کہنا تھا کہ ’اب تک کوئی آفٹر شاکس ریکارڈ نہیں کیے گئے ہیں لیکن ساتھ ہی انہوں نے لوگوں کو خبردار رہنے کی ہدایت کی ہے‘۔

دویکوریتا کرناوتی نے مقامی نیوز چینل کو بتایا کہ ’ابھی کے لیے محتاط رہنا ہی بہتر ہے‘۔

واضح رہے کہ پچھلے مہینے مغربی جاوا کے سیانجور میں 5.6 شدت کا زلزلہ آیا تھا جس کے نتیجے میں 300 سے زائد افراد جاں بحق ہوئے تھے۔