انتہائی دائیں بازو سے تعلق رکھنے والے اسرائیلی قومی سلامتی کے وزیر ایتمار بن گویر نے مسجد الاقصیٰ کا اشتعال انگیز دورہ کیا ہے۔

غیر ملکی خبر رساں ادارے کے مطابق انتہائی دائیں بازو سے تعلق رکھنے والے اسرائیلی وزیر ایتمار بن گویر نے اپنا عہدہ سنبھالنے کے بعد پہلا دورہ مسجد الاقصیٰ کا کیا۔

ایتمار بن گویر اسرائیلی قومی سلامتی کے وزیر ہیں اور ان کا تعلق انتہا پسند یہودی سیاسی جماعت سے ہے جب کہ فلسطینیی حکام نے مقدس مقام کے دورے کو ’بے مثال اشتعال انگیزی‘ قرار دیتے ہوئے اس کی مذمت کی ہے۔

عالمی میڈیا کے مطابق اسرائیل کی نئی قوم پرست حکومت کے بننے کے بعد کشیدگی میں اضافہ ہوا ہے جب کہ فلسطینی تحریک حماس نے اس دورے پر انتباہ جاری کیا ہے۔

حماس کے جواب میں ایتمار بن گویر نے کہا ہے کہ ’ہماری حکومت حماس کی دھمکیوں کے سامنے ہتھیار نہیں ڈالے گی، ٹیمپل ماؤنٹ اسرائیل کے لوگوں کے لیے سب سے اہم جگہ ہے‘۔

غیر ملکی میڈیا نے ایتمار بن گویر کی مسجد اقصیٰ کے کمپاؤنڈ میں چہل قدمی کی تصویر بھی شائع کی ہے۔

فلسطینی وزیر خارجہ نے اس دورے پر ردعمل دیتے ہوئے کہا کہ ’ایتمار بن گویر کی جانب سے مسجد الاقصیٰ پر حملے کی شدید مذمت کرتے ہیں اور اسے غیر معمولی اشتعال انگیزی قرار دیتے ہیں‘۔

مبصرین نے خبردار کیا ہے کہ اس اقدام کے نتیجے میں ہلاکت خیز تشدد اور مقبوضہ علاقوں سمیت اسرائیل کے مسلمان شہریوں کے درمیان کشیدگی میں اضافہ ہو سکتا ہے۔

واضح رہے کہ یروشلم کے اندر واقع یہ کمپاؤنڈ وقف اسلامی امور کی کونسل کے زیر انتظام ہے، جہاں اسرائیلی افواج موجود ہیں جو رسائی کو کنٹرول کرتی ہیں۔