اقوام متحدہ کے سیکریٹری جنرل انتونیو گوتریس کا کہنا ہے کہ پاکستان قدرتی آفات کےساتھ کرپٹ عالمی معاشی سسٹم کاشکارہے۔

تفصیلات کے مطابق جینوا میں عالمی ڈونرز کانفرنس سے خطاب کرتے ہوئے انتونیو گوتریس کا کہنا تھا کہ پاکستان میں انفرااسٹرکچر کی بحالی کے لیے بڑے پیمانے پر اقدامات کی ضرورت ہے۔

سیکریٹری جنرل اقوام متحدہ نے کہا کہ پاکستان کو موسمیاتی تبدیلی کا سامنا ہے اور قرضوں کی ادائیگی کرنی ہے۔ قرض ادائیگی میں تعاون سے بھی امداد ہوسکتی ہے۔

مزید پڑھیں: سیلاب سے پاکستان کو 30 ارب ڈالر کا نقصان ہوا، وزیراعظم کاعالمی ڈونرز کانفرنس سے خطاب

ان کا مزید کہنا تھا کہ سیلاب کے باعث 80 لاکھ افراد بےگھر ہوئے۔ سیلاب متاثرین کی بحالی کے لیے فوری 16 ارب ڈالر کی ضرورت ہے۔

انتونیو گوتریس نے کہا کہ پاکستان میں سیلاب سے بڑا حصہ متاثر ہوا۔ پاکستانی عوام نے سیلاب زدگان کے لیے فراخدلی کا مظاہرہ کیا۔  مشکل حالات میں بھی پاکستانی عوام کا جذبہ دیکھ کر حیران ہوا۔

مزید پڑھیں: سیلاب متاثرین کی بحالی کا آدھا کام پاکستان اپنے وسائل سے کرے گا، وزیرخارجہ

سیکریٹری جنرل اقوام متحدہ کا کہنا تھا کہ   کانفرنس کے ذریعے کیش، ٹرانسفر و دیگر طریقہ کار پر امداد ہوسکتی ہے۔

انہوں نے کہا کہ پاکستان میں سیلاب سے تباہی دیکھ کر دل ٹوٹ گیا۔ پاکستان سے یکجہتی کرنے والے ممالک کا شکریہ ادا کرتا ہوں۔