عراق میں 22 سالہ یوٹیوبر طیبہ العلی کو ان کے والد نے غیرت کے نام پر قتل کردیا ہے۔

غیر ملکی خبر رساں ادارے کی رپورٹ کے مطابق عراق میں 22 سالہ خاتون یوٹیوبر کو ان کے والد نے غیرت کے نام پر گلا دبا کر قتل کردیا ہے۔

رپورٹ کے مطابق خاتون یوٹیوبر 25 ویں گلف چیمپئن شپ میں شرکت کے لیے ترکی سے واپس عراق آئی تھیں جب کہ ان کے قتل سے عراقی عوام میں شدید غم و غصہ پایا جاتا ہے۔

رپورٹ میں کہا گیا ہے خاتون یوٹیوبر کے اپنے خاندان کے ساتھ مسائل چل رہے تھے جس کی وجہ سے وہ ترکی چلی گئی تھی، جہاں وہ شامی نوجوان محمد الشامی سے شادی کرنا چاہتی تھیں جس کے لیے ان کے گھر والے راضی نہیں تھے۔

اس واقعے کے بعد سے ہی وہ استنبول میں مقیم تھیں لیکن اپنی والدہ کے کہنے پر واپس عراق آگئی تھی تاہم عراق پہنچنے پر انہیں مسلسل قتل کی دھمکیاں مل رہی تھیں جس کا اظہار انہوں نے اپنے انسٹاگرام اکاؤنٹ پر بھی متعدد بار کیا تھا۔

علاوہ ازیں انہوں نے سیکیورٹی حکام سے بھی تحفظ کی اپیل کی تھی لیکن پولیس جرم ہونے سے نہ روک سکی جب کہ ان کے قتل نے سوشل میڈیا پر ہنگامہ برپا کردیا ہے اور انصاف کی اپیل کے لیے اتوار کو مظاہرے کی بھی کال دے رکھی ہے۔

سیکیورٹی ذرائع کا کہنا ہے کہ قاتل نے اپنے جرم کا اعتراف کرلیا ہے اور خود کو پولیس کے سامنے پیش کردیا ہے۔