امریکہ نے گرفتاریوں کے پیش نظر اپنے شہریوں کو فوری طور پر روس چھوڑنے کی ہدایت جاری کردیں ہیں۔

غیر ملکی خبر رساں ادارے کے مطابق ماسکو میں امریکی سفارت خانے نے اپنے شہریوں سے کہا ہے کہ ’روس کا سفر کرنے والے یا وہاں پر مقیم امریکی فوری طور پر روانہ ہوجائیں‘۔

رپورٹ کے مطابق امریکہ نے روسی سیکیورٹی ایجنسیوں کی جانب سے ہراساں کرنے اور گرفتار کرنے کے خدشے کے پیش نظر یہ ہدایات جاری کی ہیں۔

امریکی سفارت خانے کا اپنے بیان میں کہنا تھا کہ روسی سیکیورٹی ایجنسیوں نے امریکی شہریوں کو غلط الزامات میں گرفتار کیا ہے جب کہ روس نے خاص طور پر امریکی شہریوں کو نشانہ بنایا ہے۔

امریکی سفارت خانے نے الزام عائد کیا کہ گرفتار ہونے والے امریکی شہریوں کے ساتھ درست اور شفاف سلوک نہیں کیا جارہا ہے جب کہ انہیں ٹھوس ثبوت کے بغیر ہی خٖفیہ ٹرائلز سے گزارا گیا ہے۔

واضح رہے کہ امریکہ نے اس سے قبل گزشتہ سال ستمبر میں بھی اپنے شہریوں کو روس چھوڑنے کا انتباہ جاری کیا تھا۔