چین نے امریکی وفاقی تحقیقاتی ادارے (ایف بی آئی) کے کورونا وائرس کے چینی شہر ووہان کی لیب سے پھیلنے والے دعوؤں کو مضحکہ خیز قرار دے دیا ۔

بین الاقوامی  خبر رساں ادارے کے مطابق  چین نے امریکی وفاقی تحقیقاتی ادارے  کے سربراہ کرسٹوفر رے کے بیان کو مضحکہ خیز قرار  دیتے ہوئے کہا کہ  چین سیاسی مقاصد  کے لیے حقائق کو مسخ کرنے کی کسی بھی کوشش کو برداشت نہیں کرے گا۔

یہ بھی پڑھیں: کورونا وائرس کی سب سے زیادہ تیزی سے پھیلنے والی نئی قسم دریافت

چینی وزارت خارجہ کی ترجمان کی جانب سے جاری بیان میں کہا گیا کہ  امریکی وفاقی تحقیقاتی ادارے کا فراڈ اور دھوکہ دہی پر مبنی ماضی کا ٹریک ریکارڈ دیکھتے ہوئے ان کی جانب سے کیے گئے دعوؤں کی کوئی ساکھ باقی نہیں رہتی ۔

چینی وزارت خارجہ کی ترجمان نے مزید کہا کہ ہم امریکہ سے امید کرتے ہیں کہ وہ سائنس اور حقائق کا احترام کریں گے۔

یہ بھی پڑھیں: کورونا وائرس کی ابتداء چینی لیبارٹری سے ہوئی، ایف بی آئی کا دعویٰ

واضح رہے کہ  ایف بی آئی کے  سربراہ نے گزشتہ روز ایک انٹرویو کے دوران کہا تھا کہ جائزوں سے معلوم ہوتا ہے کہ کورونا وائرس نے چین کے شہر ووہان کی ایک لیب سے نکل کر عالمی وباء کی صورت اختیار کی تھی۔