نئی دہلی: بھارتی ریاست منی پور میں تشدد، مار دھاڑ اورجلاﺅ گھیراﺅ کا سلسلہ بدستور جاری ہے۔

کشمیر میڈیا سروس کی رپورٹ کے مطابق بھارتی ریاست منی پور میں پیش آنے والے ایک تازہ واقعے میں ایک ادھیڑ عمرخاتون کو گولی مارکر ہلاک کردیا گیا ہے۔

رپورٹ کے مطابق مسلح افراد نے پچاس سالہ خاتون کے چہرے پر گولی ماری اور فرار ہونے سے قبل اس کی شکل مسخ کردی۔

رپورٹ کے مطابق خاتون کو ساومبنگ کے علاقے میں گھر پر گولی ماری گئی ہے جب کہ ایک اور واقعے میں اوانگ سیکمائی کے علاقے میں تین ٹرکوں کو آگ لگا دی گئی ہے۔

پولیس کے مطابق ایل پی جی سلنڈر لے جانے کے لیے استعمال ہونے والے ٹرک کھلے میدان میں کھڑے تھے کہ انہیں آگ لگادی گئی۔

دوسری جانب ریاست میں انٹرنیٹ پر پابندی میں 20 جولائی تک توسیع کردی گئی ہے۔

واضح رہے کہ منی پور میں 3 مئی سے ہندو اور عیسائی برادریوں کے درمیان جھڑپوں کا سلسلہ شروع ہوا تھا جس کے بعد سے اب تک دیڑھ سو کے قریب لوگ ہلاک ہوچکے ہیں۔