سری نگر: قابض بھارتی فوج کی مقبوضہ کشمیر میں دہشت گردی جاری ہے جب کہ حال ہی میں 4 کشمیری نوجوانوں کو شہید کردیا گیا ہے۔

کشمیر میڈیا سروس کی رپورٹ کے مطابق غیر قانونی طور پر بھارت کے زیرِ قبضہ جموں و کشمیر میں بھارتی فوجیوں نے اپنی ریاستی دہشت گردی کی تازہ کارروائی کے دوران ضلع پونچھ میں 4 اور بے گناہ کشمیری نوجوانوں کو شہید کردیا ہے۔

رپورٹ کے مطابق گزشتہ 24 گھنٹے کے دوران شہید ہونے والے نوجوانوں کی تعداد بڑھ کر 6 ہوگئی ہے۔

بھارتی فوج نے نوجوانوں کو ضلع کے علاقے سرنکوٹ میں تلاشی اور محاصرے کی پر تشدد کارروائی کے دوران شہید کیا ہے۔

یہ کارروائی بھارتی فوجیوں نے پیر کو شروع کی تھی جو آخری اطلاعات ملنے تک جاری ہے۔ پیر کو فوجیوں نے پونچھ کے جنرل ایریا میں ایک کارروائی کے دوران دو نوجوانوں کو شہید کیا تھا۔