گرمی کی شدت اور تیز ہواؤں کے باعث یونان کے مختلف جنگلات میں آگ بھڑک اٹھی ہے۔

غیر ملکی خبر رساں ادارے کی رپورٹ کے مطابق ایتھنز کے نواحی علاقوں کراتیا، لوتراکی اور درونو خوریہ میں آگ کی شدت زیادہ ہے۔

فائر بریگیڈ 112 کی جانب سے ان علاقوں میں ایمرجنسی پیغام بھیج دیا گیا ہے۔

فائر بریگیڈ حکام کا کہنا ہے کہ اس وقت ایتھنز کے علاقے میں چھ سے سات بیفور ہوائیں چل رہی ہیں جس کی وجہ سے آگ بھجانے میں مشکلات پیش آرہی ہے۔

اس موقع پر لوگوں کو گھروں کی کھڑکیاں اور دروازے بند رکھنے کا کہا گیا ہے جب کہ کئی جگہوں پر اس وقت آگ تین کلو میٹر تک پھیل چکی ہے۔

رپورٹ میں کہا گیا ہے کہ کچھ جگہوں پر تو آگ سات سے دس کلومیٹر تک پھیلی ہوئی ہے جب کہ فائر بریگیڈ، پولیس اور فوج کے جوان آگ بھجانے میں مصروف ہیں۔

واضح رہے کہ یونان میں زیادہ تر پہاڑی علاقہ ہے جس پر جنگلات ہیں اور گرمیوں میں تیز ہوائیں چلنے کی وجہ ہرسال جنگلات میں آگ لگ جانے کے واقعات رپورٹ ہوتے ہیں۔