غزہ میں جاری اسرائیلی حملوں میں تیزی آگئی ہے جب کہ حالیہ حملے میں پناہ گزینوں کے لیے اقوام متحدہ کے ادارے کے 9 اہلکار ہلاک ہوگئے ہیں۔

غیر ملکی خبر رساں ادارے کی رپورٹ کے مطابق اسرائیل کے حالیہ حملے میں اقوام متحدہ کے ادارے ریلیف اینڈ ورکس ایجنسی برائے فلسطینی پناہ گزین کے 9 اہلکار ہلاک ہوگئے ہیں۔

رپورٹ کے مطابق غزہ کی پٹی پر اقوام متحدہ کا ہیڈکوارٹر اسرائیلی حملوں میں تباہ ہوگیا ہے۔

ادارے کی کمیونیکیشن کی ڈائریکٹر جولیٹ ٹوما کہتی ہیں ’’ایسے حالات میں شہریوں کا تحفظ سب سے اہم ہے، انہیں جنگی قوانین کے مطابق تحفظ دیا جانا چاہیے‘‘۔

ان کا کہنا ہے کہ حملوں میں اقوام متحدہ کے عملے کو ان کے گھروں میں ہلاک کیا گیا جب کہ اسرائیلی حملوں کے بعد ادارے کے 18 اسکولوں کو پناہ گاہوں میں تبدیل کیا گیا۔

انہوں نے مزید بتایا کہ بمباری میں اسکولوں کو کافی نقصان پہنچا ہے اور غزہ شہر میں ان کے ہیڈ کوارٹر کو بھی نقصان پہنچا ہے تاہم کسی جانی نقصان کی کوئی اطلاع نہیں۔

خیال رہے کہ حماس اور اسرائیل کےدرمیان شدید جھڑپیں پانچویں روز میں داخل ہوگئی ہیں، اس دوران اسرائیل کی جانب سے غزہ کی ناکہ بندی سخت کردی گئی ہے جب کہ بجلی اور پانی سمیت اشیائے خوردونوش کی رسد بھی بند کردی ہے۔

اسرائیل افواج کی جانب سے مسلسل رہائشی عمارتوں، اسپتالوں اور اسکولوں کو بمباری کا نشانہ بنایا جارہا ہے۔

واضح رہے کہ اسرائیلی فوج کی جانب سے وحشیانہ بمباری میں 140 بچوں سمیت 1078 سے زائد فلسطینی شہید ہوچکے ہیں جب کہ زخمیوں کی تعداد 5184 سے تجاوز کرگئی ہے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.bolnews.com/urdu/world/2023/10/146843/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/world/2023/10/146843/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں