ارجنٹائن کے وسطی صوبہ کورڈوبا میں شدید گرمی کی لہر کے دوران جنگلات میں آگ بھڑک اٹھی جس کے باعث درجنوں افراد کو ان کے گھروں سے نکال لیا گیا۔

غیر ملکی خبر رساں ادارے کی رپورٹ کے مطابق منگل کو ارجنٹائن کے وسطی صوبہ کور ڈوبا کی تصاویر اور ویڈیوز سامنے آئی ہیں جن میں آبادی والے علاقوں کے قریب پہاڑوں پر بڑے پیمانے پر آگ کے شعلے دیکھے گئے ہیں۔

رپورٹ کے مطابق کچھ گھروں تک آگ پہنچ چکی تھی جس پر فائر فائٹرز نے قابو پالیا ہے تاہم یہ واضح نہیں ہوسکا ہے کہ کتنے گھر متاثر ہوئے ہیں۔

صوبائی حکومت کا کہنا ہے کہ 960 فائر فائٹرز اور دو ہیلی کاپٹرز جنگلات کی آگ پر قابو پانے کے لیے کام کررہے ہیں جب کہ درجنوں افراد کو محفوظ مقامات پر منتقل کر دیا گیا ہے۔

کورڈوبا کے گورنر جوآن شیارٹی نے سوشل میڈیا پر لکھا ’’میں لوگوں سے اپیل کرتا ہوں کہ وہ متاثرہ علاقوں میں کام کرنے والے فائٹرز اور حکام کی ہدایت کا احترام کریں‘‘۔

انہوں نے مزید لکھا ’’سب سے اہم اپنی جان بچانا ہے، لہذا جہاں انخلاء ضروری ہو تو وہاں سے فوری طور پر خود کو بچاکر نکلا جائے‘‘۔

ارجنٹائن کے نیشنل فائر منیجمنٹ سروس نے منگل کے روز خطے میں لگنے والی آگ کو پانچویں درجے کی آگ قرار دیا ہے۔

دوسری جانب حکام نے ولا کارلوس پاز شہر کے قریب واقع علاقے میں پیر کی سہہ پہر آگ لگانے کے الزام میں ایک 27 سالہ شخص کو گرفتار کیا ہے۔

مبینہ طور پر ملزم نے پولیس کو بتایا کہ اس نے کافی بنانے کے لیے آگ لگائی تھی اور تیز ہواؤں کے باعث آگ کے شعلوں پر قابو پانا مشکل ہوگیا۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.bolnews.com/urdu/world/2023/10/814175/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/world/2023/10/814175/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں