اقوام متحدہ کی سلامتی کونسل میں غزہ جنگ میں انسانی ہمدردی کے  تحت طویل وقفے کی قرارداد منظور ہوگئی۔

بین الاقوامی خبررساں ادارے کے مطابق  اقوام متحدہ کی سیکیورٹی کونسل  کے اجلاس میں  مالٹا   کی پیش کردہ غزہ جنگ میں  انسانی ہمدردی کے  تحت طویل وقفے کی قرارداد منظور ہوگئی۔

اجلاس  میں مالٹا کی قرارداد پر ووٹنگ کی گئی جس کے  حق میں 12 ووٹ پڑے ، مخالفت میں ایک ووٹ  بھی نہیں  آیا جبکہ 3 ممالک نے رائے شماری میں حصہ نہیں لیا۔

قرارداد  کے مسودے  میں غزہ جنگ میں  انسانی ہمدردی کےطویل وقفے پر زور دیا گیا ہے۔

قرارداد میں امداد کی بلا روک ٹوک فراہمی، طبی انخلاء اور غزہ میں قید یرغمالیوں کی غیر مشروط رہائی کا مطالبہ کیا گیا ہے۔

قرارداد میں زور دیا گیا ہے کہ  تمام فریقین کو بین الاقوامی انسانی قانون کی تعمیل کرنے کی ضرورت ہے۔

واضح رہے کہ گزشتہ روز اسرائیلی فوج نے درندگی اور سفاکی کا مظاہرہ کرتے ہوئے غزہ کے الشفاء اسپتال پر ٹینک چڑھا دئیےتھے۔ الشفاء اسپتال  کے کمپلیکس میں اسرائیلی  فوجی ٹینکوں سمیت داخل ہوگئے تھے۔

اسرائیلی فوج نے الشفاءاسپتال میں گھسنے کی تصدیق  کرتے ہوئے کہا  تھا کہ انٹیلی جنس معلومات کی بنیاد پر حماس کے خلاف ٹارگٹڈ آپریشن کیا گیا ہے۔

اسرائیلی فوج کا کہنا  تھا کہ کارروائی  نہ صرف انٹیلی جنس معلومات  بلکہ آپریشنل ضروریات پر مبنی ہے۔ ٹیم میں طبی عملہ اور عربی بولنے والے شامل ہیں۔

اسرائیل نے حماس پر الشفاء اسپتال کو آپریشن کے اڈے کے طور پر استعمال کرنے کا الزام عائد کیا ہے جبکہ حماس نے اس اسرائیلی دعوے کو بارہا مسترد کیا ہے۔

الشفاء کمپلیکس میں مریض، عملے اور بے گھر شہریوں سمیت 2300 افراد کئی دنوں کی شدید لڑائی اور فضائی بمباری سے پھنسے ہوئے ہیں۔

7 اکتوبر کو حماس اور اسرائیل کے درمیان شروع ہونے والی اس جنگ میں اب تک 4 ہزار سے زائد بچوں سمیت 11 ہزار سے زائد فلسطینی شہید ہوچکے ہیں جبکہ 30 ہزار کے  قریب  زخمی ہوئے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.bolnews.com/urdu/world/2023/11/115615/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/world/2023/11/115615/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں