حماس کا کہنا ہے کہ چند گھنٹوں کے اندر قطر جنگ بندی اور تفصیلات کا اعلان کرے گا۔

غیر ملکی خبر رساں ادارے کی رپورٹ کے مطابق حماس کا کہنا ہے کہ قطر چند گھنٹوں کے اندر جنگ بندی اور تفصیلات کا اعلان کرے گا۔

رپورٹ کے مطابق اس سے قبل آج صبح اسرائیل اور امریکا نے بھی جنگ بندی معاہدے کا عندیہ دیا تھا۔

رپورٹ میں کہا گیا ہے کہ حماس کے رہنما اسماعیل ہنیہ نے جنگ بندی معاہدے کے قریب پہنچنے کا عندیہ دیتے ہوئے کہا تھا کہ ہم جنگ بندی کے ایک معاہدے تک پہنچنے کے قریب ہیں۔

دوسری جانب چین نے بھی غزہ میں جنگ بندی کے لیے کردار ادا کرنے کی رضامندی ظاہر کردی ہے۔

سعودی عرب کی قیادت میں مسلم ممالک کے وزرائے خارجہ چین کے دورے پر پہنچے جہاں ان کے ہم منصب وانگ ای نے یقین دلایا کہ غزہ میں جنگ بندی کے لیے اپنا کردار ادا کریں گے۔

چین کے وزیرِ خارجہ وانگ ای نے کہا تھا کہ اسرائیل حماس جنگ کے باعث مشرقِ وسطیٰ کا امن خطرے میں پڑ گیا ہے اور اس وقت فوری جنگ بندی انتہائی اہم ہے اور اس کام کے لیے چین اپنا بھرپور کردار ادا کرے گا۔

واضح رہے کہ غزہ میں 45 روز سے جاری اسرائیلی جارحیت کے نتیجے میں شہید فلسطینیوں کی تعداد 13 ہزار 300 تک پہنچ گئی ہے۔

شہید فلسطینیوں میں 5 ہزار 500 سے زائد بچے اور 3 ہزار 500 سے زائد خواتین بھی شامل ہیں جب کہ اسرائیلی افواج نے جنگی قوانین کی خلاف ورزیاں کرتے ہوئے بلا تفریق سویلین رہائشی علاقوں، پناہ گزین کیمپوں، اسکولوں، اسپتالوں اور عبادت گاہوں کو بھی نشانہ بنایا ہے۔