ریاض: سعودی عرب میں برف باری کے بعد متعدد گاڑیاں برف میں دھنس گئی ہیں۔

سعودی عرب کے تبوک ریجن اور  القصیم میں موسلادھار بارش کے ساتھ شدید ژالہ باری ہوئی جب کہ القصیم میں شدید ژالہ باری سے سڑکیں برف سے ڈھک گئیں۔

برفباری کی وجہ سے ٹریفک کی روانی بھی متاثر ہوئی ہے جب کہ شہریوں اور سیاحوں کی بڑی تعداد برفباری دیکھنے اور موسم سے لطف اندوز ہونے کیلیے علاقے کا رخ کررہی ہے۔

خیال رہے کہ شدید برف باری کے باعث اللوز پہاڑ نے برف کی چادر اوڑھ لی ہے جس کے باعث وہاں کا منظر انتہائی حسین ہوگیا ہے۔

سردیوں کے موسم میں اللوز پہاڑ پر ہر سال برفباری ہوتی ہے اور مہم جوئی کے شوقین سیاح اس موسم میں علاقے کا رخ کرتے ہیں جب کہ اس پہاڑ کی اونچائی سطح سمندر سے دوہزار 580 میٹر بلند ہے۔

یاد رہے کہ یہ خطہ حسمیٰ کے بلند ترین پہاڑی سلسلوں میں سے ایک جانا جاتا ہے جس کے پہاڑ تبوک کے مغرب سے اردن میں وادی رم تک سروات کے پہاڑوں تک پھیلے ہوئے ہیں۔

اللوز کا پہاڑی سلسل سعودی عرب کے شمال مغرب میں تبوک ریجن میں اردن کی سرحد کے قریب تبوک شہر سے تقریباً 200 کلو میٹر شمال مغرب میں واقع ہے۔